-
Kike, que deu o salto ao primeiro equipo o curso pasado, seguirá dous anos máis de branquiazul
Santiago de Compostela, 29 de xuño de 2023
Kike Vidal seguirá dous anos máis vestindo a camiseta da SD Compostela. O mozo central de Boiro ampliou o seu contrato co club ata 2025. Tras dar o salto ao primeiro equipo o curso pasado, o Compos confirma así a continuidade dun defensor cun futuro moi prometedor.
A pesar da súa mocidade, aos seus 20 anos, Kike demostrou esta pasada campaña unha gran madurez, respondendo con sobriedade cada vez que actuou na retagarda branquiazul. Ademais, demostrou os seus dotes en defensa, sendo contundente nos choques e rápido saíndo ao corte, así como a súa capacidade para sacar o balón xogado e para facer desprazamentos en longo, dando incluso unha asistencia de gol.
Este gran traballo levoulle a contar con moitos minutos durante todo o ano, acompañando no centro da defensa tanto a Álvaro Casas como a Pablo Crespo. En total, finalizou a tempada con 20 partidos disputados, catorce deles saíndo de inicio, para un total de 1.363 minutos.
Desta forma, Kike iniciará nesta Tempada 23.24 a súa terceira campaña no seo da SD Compostela, despois dun primeiro ano no filial, o Sigüeiro, no que destacou con 30 partidos xogados, e este segundo no que estivo en dinámica do primeiro equipo desde a pretempada.
Coa súa renovación ata 2025, a SD Compostela conta xa con quince xogadores con contrato en vigor para a próxima campaña: Pato, Borja Rey, David Soto, Álvaro Casas, Kike, Pablo Crespo, Damián, Martín, Antón de Vicente, Pablo Antas, Fer Beltrán, Jordan Domínguez, Pep Caballé, Elliot e Parapar.
