-
Con ficha aínda de xuvenil, o futuro de Dani Varela quedará vinculado ao primeiro equipo
Santiago de Compostela, 30 de xuño de 2023
Dani Varela Villasenín seguirá vinculado á SD Compostela ata 2026. O lateral esquerdo santiagués, do 2006, prolonga o seu contrato por tres tempadas, polo que o seu futuro, unha vez termine a súa etapa de xuvenil, na que lle quedan dous anos, quedará ligado ao primeiro equipo branquiazul. O Compos asegúrase así a continuidade dunha das xoias do fútbol base galego.
Dani Varela chegou ao Compos o pasado verán para iniciar a súa etapa de xuvenil xa na División de Honra. A pesar de xogar contra rivais dous anos maiores, demostrou as súas grandes calidades no carril esquerdo, sendo peza fundamental do equipo durante toda a tempada, un curso no que se conseguiu, de novo, a permanencia na máxima categoría nacional.
Finalizou a campaña disputando todos e cada un dos 30 partidos de liga, saíndo sempre de inicio, para un total de 2.583 minutos de xogo. Ademais de ser un dos piares da defensa, tamén se proxectou en ataque, repartindo varias asistencias.
En todo caso, o papel de Dani Varela non quedou só no Xuvenil A do Compos, senón que tamén gozou de presenza co primeiro equipo. Así, con 16 anos, realizou toda a pretempada coa SD Compostela, disputando os amigables e marcando incluso un gol na Copa Federación. E tamén entrou nunha convocatoria de Segunda RFEF, no partido contra o Real Avilés Industrial, aínda que non chegou a debutar.
Por tanto, seguirá formando parte do Xuvenil A de DH, aínda que a súa proxección estará xa vinculada ao primeiro equipo. Deste xeito, volverá repetir experiencia estival, realizando a pretempada co Compos, e tamén adestrará durante todo o ano ás ordes de Manel Menéndez.
