-
Jaime Santos renova por unha tempada
Santiago de Compostela, 6 de xullo de 2023
Jaime Santos seguirá na SD Compostela na Tempada 23.24. O mediocentro asturiano, tras chegar ao Compos no pasado mercado invernal, amplía o seu contrato co club ata 2024. Seguirá así demostrando a calidade que atesoura, como mostrou na recta final da pasada campaña.
A pesar de ser un dos últimos en chegar á disciplina da SD Compostela, Jaime Santos, en apenas catro meses de competición, puxo sobre o verde as credenciais que abalaban a súa fichaxe. Un xogador polivalente, quen de adaptarse a diferentes posicións no mediocentro e que mesmo chegou a xogar de dianteiro, con capacidade para a creación de xogo, para dar o último pase e con gol.
Así, desde que chegou a Santiago, só se perdeu un encontro, finalizando o ano con 639 minutos de xogo en 15 partidos, sete deles partindo de inicio. Ademais, marcou 5 goles, o primeiro no seu debut e despois en catro encontros consecutivos na recta final da liga.
Desta forma, ademais de achegar ao equipo coa súa calidade e saber facer, tamén lle dará experiencia, xa que conta cun pasado importante na Segunda B e tamén en competicións internacionais, xogando nas ligas de India e Bolivia.
Coa súa renovación, a SD Compostela conta xa con 17 xogadores con contrato en vigor para a próxima campaña: Pato, Borja Rey, David Soto, Álvaro Casas, Kike, Pablo Crespo, Damián, Martín, Antón de Vicente, Pablo Antas, Fer Beltrán, Jordan Domínguez, Jaime Santos, Pep Caballé, Elliot, Parapar e Manu Barreiro.
