-
Juampa regresa ao Compos tras dúas grandes tempadas no Numancia e Unionistas
Santiago de Compostela, 15 de xullo de 2023
Juan Pablo Barros Campos (Buenos Aires, 25.03.1994), máis coñecido como Juampa, regresa á SD Compostela. O extremo, criado en Santiago desde moi pequeniño, regresa ao club da súa vida co obxectivo de lograr o ascenso. Firma por dúas tempadas, ata 2025.
A extraordinaria zurda de Juampa regresará ao Vero Boquete, onde marabillou fai tres campañas, na Segunda B. Co ‘22’ ás costas e pegado á esquerda, foi un dos fixos durante toda a tempada, dando un gran nivel nun equipo que competiu contra grandes rivais. Terminou o curso, nunha liga reducida pola pandemia, con 21 partidos disputados, un deles na Copa do Rei, nos que anotou dous goles e repartiu varias asistencias.
Tralo seu gran rendemento en Santiago, deixaría a capital para enrolarse no proxecto do Numancia, co que lograría o ascenso á Primeira RFEF. En terras sorianas disputaría 30 encontros e anotaría tres tantos, algún deles decisivo.
E de Soria, moveríase a Salamanca, o pasado verán, fichando polo Unionistas, tamén de Primeira Federación. Co cadro charro demostraría tamén a enorme calidade que atesoura, disputando 36 encontros. Neles asinaría 4 goles, algúns deles de belísima factura, e tres asistencias, sendo unha peza destacada dun equipo que loitou por clasificarse para o playoff de ascenso a Segunda ata a última xornada.
Agora, tras eses dous grandes anos, Juampa regresa a Compostela para seguir crecendo futbolisticamente e coa ilusión de poder ascender co seu Compos.
Con este reto, sumará ao equipo desborde, calidade, polivalencia, un extraordinario golpeo a balón parado e experiencia. Estas calidades, así como o seu gran rendemento, foron valoradas pola dirección deportiva para afrontar a súa fichaxe.
Neste sentido, Juampa pode actuar tanto no extremo esquerdo como nas demais posicións de tres cuartos de campo, así como de lateral. Ademais, na súa traxectoria, acumula xa 184 encontros na Segunda B, así como 36 en Primeira RFEF, pasando, tras saír da canteira do Deportivo, polo Ordes, Racing de Ferrol, Atlético Astorga, CD Boiro, Coruxo e Ebro, así como nos tres últimos equipos citados.
Coa súa incorporación, a SD Compostela 23.24 conta xa con 19 xogadores, que iniciarán a pretempada o vindeiro martes 18: Pato, Borja Rey, Riki Mangana, David Soto, Álvaro Casas, Kike, Pablo Crespo, Damián, Martín, Antón de Vicente, Pablo Antas, Fer Beltrán, Jordan Domínguez, Jaime Santos, Pep Caballé, Elliot, Parapar, Juampa e Manu Barreiro.
