-
Jesús Marque seguirá dirixindo o corpo médico do Compos
Santiago de Compostela, 4 de agosto de 2023
Manel Menéndez non estará só na súa etapa na SD Compostela. Á fronte do banco do Compos, o novo adestrador branquiazul contará cun gran equipo técnico. Xuntos, buscarán sacarlle o máximo rendemento ao plantel para lograr os obxectivos marcados.
Un curso máis, como Segundo Adestrador estará José Manuel Rodríguez ‘Cardeñosa’. O exxogador da SD Compostela acompañará a Manel neste novo camiño, sendo a súa man dereita. O técnico da Pobra, que colleu as rendas do equipo o pasado ano durante tres encontros, conta cunha gran experiencia no fútbol galego, tanto como futbolista como nos bancos.
De Preparador Físico estará Pablo Fernández Suárez. O mozo técnico acompañou a Manel durante estes últimos anos en terras asturianas e agora incorpórase con el á SD Compostela.
Como Adestrador de Porteiros, Pato Guillén e Borja Rey estarán preparados, unha campaña máis, por Pablo Castro. O exarqueiro galego, con pasado como futbolista no Compos, seguirá un curso máis sacándolle o máximo rendemento aos nosos metas.
O cadro técnico completarase con Víctor Suárez, adestrador que cumprirá a función de Analista e que tamén apoiará a Manel durante os adestramentos. Conta con experiencia dirixindo á SD Dubra en Preferente e nas categorías inferiores do ED Xuventude Oroso. Ademais, tamén será o Masaxista do club.
Ao cadro médico tamén se incorpora Germán Pérez. O xogador ourensán, con pasado na SD Compostela e unha ampla traxectoria no fútbol galego, especialmente no CD e UD Ourense, regresa á capital galega para ser o Fisioterapeuta do equipo.
E, á fronte do equipo médico estará, unha campaña máis, Jesús Marque. Un ano máis estaremos nas mellores mans co experimentado doutor, unha eminencia no campo da medicina deportiva e que coñece moi ben a casa, debido a que anteriormente foi tamén un destacado futbolista da SD Compostela.
