-
Máis de 500 nenos e nenas desfrutaron dos Campus Xacobeos este verán
Santiago de Compostela, 15 de setembro de 2023
A segunda edición dos Campus Xacobeos pechouse a pasada semana certificando o éxito total desta iniciativa. Duplicouse o número de rexistrados respecto ao pasado ano, superando os 500 participantes, estreáronse novas sedes con grandes resultados e, sobre todo, en todas as semanas de actividades, os nenos e nenas gozaron ao máximo coas actividades preparadas.
A renovación da dirección deportiva dos Campus Xacobeos demostrou ser todo un acerto. Melloráronse os exercicios, introducíronse materiais innovadores e creáronse grandes lazos de unión entre os participantes e os adestradores. Ademais, a inclusión das Cartas FIFA foi outro éxito desta edición.
Para lograr estes grandes resultados, os Campus Xacobeos contaron coa importante axuda dos seus patrocinadores. En especial, destacar o apoio do seu patrocinador principal, Cobre San Rafael, na súa aposta por potenciar o deporte base. Pero tamén foi crucial a achega de Kutxabank, Alcampo, Jim Sports e Gráficas Alonso para facer posible esta segunda edición.
E, como non, tamén merecen unha mención destacada os clubs e concellos nos que se levaron a cabo cada unha das sedes. Mención destacada para a gran acollida que tiveron os Campus Xacobeos en Touro e Arzúa, a pesar de estrearse nos Campus. Así mesmo, en Santiago, a participación multiplicouse, cunha gran presenza de cativos tamén na sede de setembro.
Ademais, tamén tiveron un papel destacado os Campus de Dumbría, onde estaremos un ano máis coa Compostec, e A Escravitude.
Por último, dar as grazas aos nenos e nenas que escolleron os Campus Xacobeos para gozar do fútbol no verán, así como aos nosos adestradores pola súa dedicación e esforzo para o desfrute dos pequenos.
Por tanto, tras pechar un gran verán de actividades para os nenos e nenas, os Campus Xacobeos despídense ata o Nadal, época na que volveremos con novas sedes e moitas sorpresas. Seguiremos traballando e innovando para que a próxima edición volva ser todo un éxito.
