-
Unha acción fortuíta, nos minutos finais, decide o partido para o Zamora, cando o Compos tivera as mellores opcións
Santiago de Compostela, 24 de setembro de 2023
O fútbol non sorriu ao Compos contra o líder. Nun duelo dominado, no que tivo as mellores ocasións, os puntos marcháronse para Zamora nunha acción fortuíta nos minutos finais. Mereceu máis a SD Compostela, pero esta tarde faltou sorte.
Nunha tarde asollada, o Compos recibía ao líder no Vero Boquete. Con cinco puntos na táboa, aínda sen perder, os nosos querían reencontrarse coa vitoria diante dos seus. Tras tres partidos nos que a SD Compostela alternou bos momentos con outros non tan bos, os de Manel Menéndez querían ter máis continuidade coa pelota e así someter a un Zamora moi sólido neste inicio de liga, xa que aínda non encaixara ningún gol antes de chegar a Santiago.
Para poder facer dano a esa armazón defensiva zamorano, o técnico compostelanista recuperou a Samu Araújo, para o lateral esquerdo, e a Jaime Santos, no enganche, únicas novidades respecto da igualada no Álvarez Rabanal.
Esa formulación sentaba ben aos nosos que arrincaban mellor a contenda. Presionando arriba e roubando balóns, en apenas tres minutos tería xa a súa primeira opción, nunha falta de Juampa que golpeou a barreira, cambiando a orientación do esférico, pero saía rozando o pau.
E pasado o minuto 25, de novo o extremo santiagués gozaría dunha ocasión inmellorable, a mellor do primeiro acto. Controlaba no pico da área, orientábaa para a súa zurda e soltaba un golpeo potente, pero a pelota, tras botar, estrelábase contra o poste.
Co susto no corpo, o Zamora de David Movilla soltábase e camiñaba máis cara a terreo ofensivo. Cunha presión máis intensa, dificultaba as triangulacións dos branquiazuis e coa súa solidez atrás, non permitía que ninguén se achegase ao seu arco.
Por iso, sen perigo en ambas áreas, chegábase ao intermedio co 0-0 inicial.
Á volta dos vestiarios, cos mesmos protagonistas, a contenda regresaba a esa sensación de que ningún equipo conseguía predominar sobre o outro, pero rapidamente cambiaban as tornas e eran de novo os locais os que apertaban máis sobre portería rival.
A través de gañar balóns no centro do campo, chegaba en continuas ocasións a área contraria, xerando moito perigo. Tentábao Parapar pola dereita, Juampa pola esquerda e Manu Barreiro por arriba, pero non se tentaba de concretar ningunha acción.
Tería que ser a balón parado como chegaría a ocasión de maior perigo, coa pelota nas redes, pero o colexiado interpretaba que o despexe de Fermín golpeaba na man de Álvaro Casas, anulando o tanto dos nosos.
Entraba Hugo Matos e o canteirán tamén tería a súa, cabalgando por liña de fondo, pero sen atopar o remate. E pouco despois, na mesma banda dereita, aparecía Parapar para pór un servizo raso con veleno que non chegou a Pep Caballé por moi moi pouco.
Con todo, cando mellor estaban os nosos, o que acabaría chegando sería o tanto visitante. Nunha acción illada en banda dereita, no 81, Morales gañaba o esférico, entraba na área, puña o servizo pola liña de gol, a pelota pegaba no pau, en Pito Camacho e quedaba para que Víctor López só tivese que empuxala. Un golpe de fortuna para o 0-1.
E as desgrazas non virían soas, porque tres minutos máis tarde, e tras un disparo de Juanan ao traveseiro, o colexiado sinalaba una falta de Pep Caballé que lle custaba o segundo cartón amarelo.
Con dez contra once e un rival que aproveitaba cada momento para gastar o tempo, o Compos non podía xerar ningunha mínima ocasión. Tentábao a balón parado, pero non había forma de achegarse a Fermín.
Por este motivo, sen moverse máis o marcador, acabábase a contenda co 0-1, un xerro de auga fría para un Compos que propuxo máis sobre o verde, pero ao que a fortuna non lle sorriu nesta tarde de fútbol no Vero Boquete.
Con todo, no fútbol, cada semana hai unha reválida, e o vindeiro domingo, ás 19.00 horas, haberá outra opción no Vero Boquete, no primeiro derbi da tempada, contra o Ourense.
FICHA TÉCNICA
0 – SD COMPOSTELA: Pato Guillén; Pep Caballé, David Soto, Álvaro Casas, Samu Araújo; Antón de Vicente, Pablo Antas (Fer Beltrán, m.81); Parapar, Jaime Santos (Jordan, m.81), Juampa (Hugo Matos, m.63); e Manu Barreiro.
1 – ZAMORA CF: Fermín; Víctor López (Roger, m.88), Luengo, Bolo, Castañeda; Mancebo (Jesús Muñoz, m.71), Juanan, Carlos Ramos, Joel Priego (Luis Rivas, m.88); Markel Goñi (Morales, m.54); e Pito Camacho (Etxaburu, m.88).
GOLES: 0-1: Víctor López, min.80.
ÁRBITRO: Rodríguez García (Asturias). Expulsou a Pep Caballé (m.84) por dobre amarela. Ademais, amoestou a Juampa e Manu Barreiro, polo Compos; e a Luengo, polo Zamora.
INCIDENCIAS: Estadio Verónica Boquete de San Lázaro (Santiago de Compostela). Xornada 4 do Grupo 1 da Segunda RFEF disputado ante 1.304 espectadores. Antes do encontro gardouse un minuto de silencio en memoria do xornalista Pepe Domingo Castaño, socio de honra do Compos.
