-
Roque renova a súa vinculación coa SD Compostela ata 2025
Santiago de Compostela, 21 de xuño de 2024
Roque González Delgado (Ames, 09/07/2002) seguirá un ano máis vestido de branquiazul. O canteirán da SD Compostela cumprirá a súa quinta campaña no Compos, cuarta co primeiro equipo, despois de ampliar a súa vinculación co club por un ano máis, ata xuño de 2025.
Deste xeito, o Compos seguirá contando cun xogador da casa, un canteirán ao que coñece moi ben o corpo técnico e que asegura compromiso, traballo duro e un gran potencial futbolístico.
Nesta liña, trala súa volta no pasado mercado invernal, Roque rapidamente recuperou sensacións e asentouse no once titular do Compos. Estivo tan só medio ano, pero nel puido disputar 16 encontros, 11 deles como titular, para superar os 1.000 minutos no verde. Ademais, demostrou o seu crecemento no xogo, realizando grandes actuacións tanto de lateral como de central.
Coa camiseta branquiazul, ademais da súa tempada no Xuvenil A, suma xa 78 partidos oficiais co primeiro equipo, cifras que seguirá incrementando a próxima campaña, na que agardar darlle moitas alegrías á afección.
Ledos de seguir contando contigo, Roque.
