Compostela está de loito. Este 24 de xuño de 2024, día de San Xoán, deixounos, aos 77 anos de idade, José María Caneda Antelo (Amio, Santiago, 1 de febrero de 1947).
Un día triste para a SD Compostela e para toda a cidade, que despide a unha das grandes figuras da historia do club compostelán. Un mandatario que conseguiu, en tan só seis tempadas, un fito único e histórico: levar ao Compos dende a Terceira ata a Primeira División.
Caneda tomou as rendas do club en 1988, acadando, na tempada 89/90, o seu primeiro gran logro. Da man de Fernando Castro Santos, este sería o primeiro de tres ascensos. Precisamente, na 90/91 chegaría o salto de categoría dende a Segunda División B a Segunda División, logo dunha promoción, sendo a primeira vez que o club chegaba á división de prata do fútbol español.
Logo de asentarse na categoría, o gran éxito na historia de José María Caneda chegaría nun mes de xuño, o de 1994. Logo dunha campaña formidable, o Compos ascendía á Primeira División despois de superar no partido do desempate da promoción ao Raio Vallecano. Un encontro que está na memoria de todos os compostelanistas e do que se cumpriu, hai unhas semanas, o seu 30 aniversario.
Na Primeira, o Compos de Caneda estaría catro tempadas, catro cursos nos que o expresidente deixou grandes anécdotas e recordos, e no que o club competiu contra os mellores equipos de España, acadando mesmo un subcampionato de inverno na 95/96. Unha época dourada que recordamos con gran agarimo.
Caneda estaría no cargo ata 2011, nun periplo no que tamén conseguiu que o club estivese catro tempadas máis no fútbol profesional, competindo na Segunda División. Así, tras 23 anos na presidencia, que sempre serán recordados, deixaría o cargo.
Dende o club só temos palabras de agradecemento por todo o que acadou José María Caneda.
Sempre estarás nos nosos corazóns 🖤
