-
O Compos iniciará a pretempada o 17 de xullo e xa coñece os seus primeiros rivais
Santiago de Compostela, 4 de xullo de 2024
A SD Compostela comeza a trazar a súa folla de ruta para o verán. A pretempada está ao virar a esquina e os nosos xa coñecen os seus primeiros rivais para a preparación estival. O Compos arrincará a Tempada 2024/25 este próximo 17 de xullo, iniciando sete semanas de preparación para chegar en plena forma á primeira xornada ligueira, prevista para a fin de semana do 1 de setembro.
Con Antón Permuy á fronte do equipo, o Compos comezará os adestramentos o vindeiro mércores 17 de xullo, na que será a primeira toma de contacto co verde, tralo parón estival.
Iniciaranse así sete semanas de carga de traballo para o plantel da SD Compostela, nos que se combinarán as sesións no San Lázaro II con partidos amigables.
Precisamente, neste sentido, o Compos xa coñece aos seus primeiros rivais para a pretempada.
En primeiro lugar, o club confirmou un amigable para o 3 de agosto, en Barraña, contra o CD Boiro, conxunto que acaba de ascender a Terceira RFEF e que dirixe Cardeñosa.
Pola súa banda, o 17 de agosto, a SD Compostela organiza un Torneo Triangular en Ordes, no Campo Municipal de Vista Alegre, no que se medirá ao Ourense CF, recentemente ascendido á Primeira RFEF, e ao Bergantiños, conxunto ao que se enfrontará esta campaña na Segunda RFEF.
Estes son os primeiros duelos confirmados da pretempada. Nas próximas datas iranse coñecendo máis detalles do período estival para a SD Compostela.
