-
Santi de Prado, con ficha sub23, regresa ao Compos tras unha sensacional campaña na UD Ourense
Santiago de Compostela, 20 de xuño de 2024
Santiago de Prado Lourido (Vigo, 30/11/2002), máis coñecido como Santi de Prado, está de volta. O mozo e polivalente futbolista, con ficha sub23, regresa á SD Compostela tras un brillante ano nas filas da UD Ourense. Firma por 1 ano, con opción a outro máis, e convértese na cuarta fichaxe do Compos para a Tempada 2024/25.
Santi de Prado é un xogador con gran proxección e que destaca pola súa rapidez e a súa potencia. Un correcamiños da banda, que se adapta á perfección tanto a xogar de lateral como de extremo. Un futbolista que, como leva demostrando nestes últimos cursos, é quen de repetir esforzos continuos, abarcar moito campo e achegar moita enerxía ao equipo, sendo un puñal para as defensas rivais cos seus desbordes e as súas continuas chegadas a área rival.
Estas calidades, unidas á súa ambición por crecer e seguir mellorando, así como ao gran coñecemento que ten do que significa o Compos, levaron á dirección deportiva da SD Compostela a afrontar a súa fichaxe para o proxecto branquiazul.
Neste senso, Santi de Prado vén de realizar un ano sensacional na UDO, sendo un dos seus xogadores máis destacados dun conxunto que pelexou, ata a última rolda autonómica, polo ascenso á Segunda RFEF. A súa participación ascendeu a preto de 3.000 minutos de xogo en 35 encontros disputados, nos que anotou 2 goles e nos que deixou moi patente a súa garra, esforzo e sacrificio.
Un potencial que xa mostrara nas súas campañas no filial compostelanista. E é que Santi de Prado aterrou no Sigüeiro no seu primeiro ano sénior para converterse nun dos futbolistas de referencia da Canteira Picheleira. Así, alternou a súa participación na Preferente Galicia coa súa presenza no primeiro equipo da SD Compostela.
Neses dous anos en Compostela disputou 56 encontros co Sigüeiro, anotando 5 goles. Pola súa banda, co primeiro equipo, debutou na 20/21, saíndo desde o banco nos últimos minutos do duelo contra o Langreo. E repetiu experiencia na 21/22, tanto nas semifinais da Copa Federación como na Segunda RFEF, precisamente, tamén contra o Langreo. Ademais, estivo tamén moi presente nas pretempadas, disputando unha gran cantidade de amigables co Compos.
Por iso, coa ambición de seguir dando saltos a nivel futbolístico e demostrar todo o seu potencial, regresa á SD Compostela coa mochila chea de ilusión e de gañas. A banda do Vero Boquete prepárase para as carreiras continuas de Santi de Prado.
Benvido de novo e moita sorte, Santi!
