-
Landeira, tras contar con minutos o curso pasado, formará parte do primeiro plantel da SD Compostela
Santiago de Compostela, 19 de xuño de 2024
Un novo ascenso desde a Canteira Picheleira. Gonzalo Landeira Rodríguez (Santiago de Compostela, 01/04/2004) é novo xogador da SD Compostela para a Tempada 2024/25. O canteirán compostelanista, tras unha gran última campaña, na que dispuxo de minutos na Segunda RFEF, formará parte do primeiro equipo, ampliando o seu contrato co club ata 2025.
Como xa demostrou a pasada tempada, Landeira é un centrocampista con gran visión de xogo, último pase, capacidade física para abarcar moito campo e moi polivalente, xa que pode actuar tanto en posicións centradas como escorado a algunha das bandas.
Un futbolista mozo, cun gran potencial e proxección, e ao que coñecen moi ben Antón Permuy e Dani Gesto, tanto da súa etapa en categorías inferiores, estando ás ordes de ambos no Conxo e no Compos; como do curso pasado, no que estivo, durante todo o ano, en dinámica de primeiro equipo.
Nesta liña, a pasada campaña, no seu primeiro ano como sénior, Gonzalo Landeira foi convocado en 19 encontros, tendo minutos en oito deles, repartidos entre liga e Copa do Rey. Precisamente, na competición copeira, foi onde se produciu o seu debut oficial, disputando os últimos minutos do encontro contra o CD Tenerife.
Do mesmo xeito, a súa presenza co primeiro equipo alternouna o pasado ano coa participación co filial. Co Sigüeiro xogou 21 encontros, o último deles esta pasada fin de semana na Copa Deputación, nos que ademais anotou 3 goles.
Anteriormente, Landeira desenvolvera a súa formación na base do Conxo, superando etapas ata chegar ao último ano xuvenil, no que deu o salto ao División de Honra do Compos. Nese último curso foi un dos puntais do conxunto branquiazul, con 24 partidos disputados e 4 goles anotados, axudando ao equipo a lograr a salvación na máxima categoría.
Ese gran rendemento abriulle as portas do filial e, agora, do Compos. Por tanto, trátase doutra gran noticia para a Canteira Picheleira. Un novo canteirán que chega ao primeiro equipo, previo paso polo Sigüeiro, co que recentemente se renovou o convenio de colaboración.
Con moita fame e moita ilusión, Gonzalo Landeira iniciará esta pretempada como membro de pleno dereito do vestiario do Vero Boquete. Unha campaña na que seguirá demostrando o seu crecemento e calidade para o deleite dos afeccionados compostelanistas.
Parabéns, Gonzalo!
