-
O Compos conseguiu, por fin, o primeiro triunfo como local na liga: 1-0, contra o Guijuelo
Santiago de Compostela, 20 de outubro de 2024
E por fin chegaron os 3 puntos. Na mesma semana na que se logrou o primeiro triunfo da tempada na casa, coa vitoria ante o Poblense na Copa Federación, tamén se conseguiu a primeira na Liga. 1-0 contra o Guijuelo, para levantar a cabeza e impulsarse animicamente.
O triunfo chegou deixando a portería a cero, como en Luanco, un duelo no que houbo que sufrir, pero no que o peso e a maior parte das ocasións foron branquiazuis.
Por parte compostelanista, o xogador que máis perigo levou, cos seus desequilibrios e as súas aparicións entre liñas, foi, unha vez máis, Hugo Matos. O extremo callou un partidazo e, ademais, tamén anotou o tanto da vitoria, transformando á perfección un penalti que el mesmo provocou.
Foi o seu primeiro tanto da campaña, cifra que non se incrementaría por pouco, xa que tivo máis accións de moito perigo para aumentar a vantaxe, especialmente unha xogada polémica, na que foi derrubado outra vez dentro da área, coa que se pechou a primeira metade.
Ademais de Hugo, tamén Carlos Cinta, á media hora, ou Manu Rivas, nada máis arrincar a segunda metade, puideron ampliar o marcador en favor do Compos, pero Guzmán tapoulles todos os ocos e non puideron mandar a pelota á rede.
Por iso, con vantaxe mínima, os últimos minutos pasaron moi lentos para os intereses branquiazuis. Aínda que os nosos se defenderon ben, o Guijuelo tería a súa no último minuto, cunha cacholada de Sillero que un espléndido Rabanillo sacou da escuadra.
Así, chegouse ao final e a bancada do Vero Boquete estalou de xúbilo. Por fin chegara a vitoria que todos desexaban. Tres puntos moi traballados, merecidos e deixando a portería a cero, gran obxectivo dos nosos para impulsarse na clasificación.
Agora, tras moitas semanas de dobre partido, tocará unha semana limpa para repor forzas e encarar o esixente duelo deste próximo sábado contra o Real Avilés Industrial, ás 18.00 horas no Estadio Román Suárez Puerta.
FICHA TÉCNICA
1 – SD COMPOSTELA: J. Rabanillo; Roque, David Soto, Ocaña, Manu Rivas (Pablo Crespo, min.64); Santi de Prado, Selasi (Samu, min.84), Álvaro Casas (Pablo Antas, min.64), Fer Cano (Landeira, min.84); Hugo Matos e Carlos Cinta (Manu Barreiro, min.72).
0 – CD GUIJUELO: J. Guzmán; Montes, Javi H., Ezkurdia, Boigues; Expo Jr, Fran López (Sillero, min.73), Cristóbal; Garban (Morales, min.60), Carmona (Kike López, min.46) e Pana.
GOLES: 1-0: Hugo Matos (p.), min.38.
ÁRBITRO: Morato Vega (A Rioxa). Amoestou a David Soto, Carlos Cinta, Hugo Matos, Pablo Antas, Landeira, Samu e Santi de Prado, polo Compos; e a Cristóbal e Pana, polo Guijuelo.
INCIDENCIAS: Estadio Vero Boquete de San Lázaro (Santiago de Compostela). Partido da Xornada 8 de Liga do Grupo 1 da Segunda Federación disputado ante 1.345 espectadores. Antes do encontro gardouse un emotivo minuto de silencio na memoria de María Rosa Pais, abonada número 49 do club e secretaria da Peña Fonte Sequelo.
