-
O Compos empatou 0-0 no Román Suárez Puerta nun duelo no que mereceu mellor sorte
Santiago de Compostela, 26 de outubro de 2024
A SD Compostela vai a máis. Os nosos sacaron un punto de moito valor do Román Suárez Puerta, un campo inexpugnable ata o día de hoxe. Un empate, 0-0, que ben puido ser unha vitoria se non ser polos paus e a incrible actuación do porteiro local.
A pesar de xogar contra un rival que estaba a pelexar polo liderado e nun dos campos máis complicados da categoría, o Compos xogou sen complexos e demostrou o seu fútbol, sendo moi dinámico en ataque e sólido atrás.
Só un chisco de mala fortuna evitou que a contenda non se marchase para Santiago. E é que, na primeira metade, superado o primeiro cuarto de hora de tenteo, o Compos deu un pase adiante e atopouse, ata en catro ocasións, só diante de Álvaro. Con todo, Hugo Matos e Carlos Cinta topáronse co traveseiro e o pau, respectivamente; mentres que Fer Cano e Manu Rivas fixérono co porteiro, cando xa se cantaba o gol.
Na segunda parte, a contenda estivo máis igualada, pero iso non evitou que Fer Cano volvese gozar dunha ocasión inmellorable, xa na recta final, pero nun novo man a man, atopouse coa parada do meta local.
Pola súa banda, en clave defensiva, Rabanillo, moi seguro na xornada de hoxe, volveu deixar a portería a cero por segunda xornada consecutiva. O gran traballo defensivo e as súas boas accións, cando tivo que intervir, permitiron que o Compos aguantase sen encaixar. A destacar, especialmente, un despexe cos pés nunha contra de Alarcón e unha voada a disparo afastado de Bautista.
Con este punto, os nosos seguen crecendo na liga, saíndo dos postos de descenso directo e, sobre todo, mellorando nas sensacións mostradas sobre o verde. Agora tocará unha semana de dobre partido na casa. O martes, a gozar da Copa do Rei contra o Deportivo Alavés, equipo de Primeira División; e o domingo, derbi contra o Coruxo para tentar conseguir outros tres puntos na casa.
FICHA TÉCNICA
0 – REAL AVILÉS INDUSTRIAL: Álvaro Fernández; Soler, Luis Martínez, J.C. Babin, Osky; Rubén Alarcón (Eric Callís, min.76), Jose Martínez, Kevin Bautista, Davo (Nico Fernández, min.89); Javi Cueto (Mecerreyes, min.60) e Natalio (Sergio García, min.60).
0 – SD COMPOSTELA: J. Rabanillo; Santi de Prado; Roque, Pablo Crespo (David Soto, min.85), Ocaña, Manu Rivas; Álvaro Casas (Samu, min.85), Selasi, Fer Cano (Landeira, min.89); Hugo Matos (Giuliano, min.85) e Carlos Cinta (Manu Barreiro, min.87).
ÁRBITRO: Sánchez Ingidua (Castela e León). Amoestou a Jose Martínez, polo Avilés; e a Hugo Matos, Carlos Cinta e Giuliano, polo Compos.
INCIDENCIAS: Estadio Román Suárez Puerta (Avilés). Jornada 9 do Grupo 1 da Segunda RFEF disputada ante 1.511 espectadores. Antes do partido gardouse un minuto de silencio en memoria do exxogador do Avilés Manuel Ángel Matabuena e do seu abonado número 9, José Ramón Menéndez, recentemente falecido.
