-
Derrota 0-1 ante o Alavés nun partido de Copa no que o Compos competiu ata o final
Santiago de Compostela, 29 de outubro de 2024
A SD Compostela quedou eliminada da Copa do Rei, pero fíxoo coa cabeza alta, cunha mostra de carácter contra todo un equipo de Primeira División nun partido para o recordo. 0-1 final contra o Deportivo Alavés.
Foi unha eliminatoria de Copa moi igualada, coma se non houbese diferenza de categoría entre ambos conxuntos. Para facelo posible, os nosos demostraron moita garra, valentía e coraxe. Todo iso, unido ao alento dun Vero Boquete entregado, cun ambientazo que non se vía en anos, provocou que o duelo fose de ti a ti.
Ao final, decidiu o solitario gol do Alavés aos 12 minutos, nunha acción desafortunada do Compos, con gol en propia de Kike.
Foi unha das poucas chegadas dos visitantes, xa que o Compos estivo moi serio atrás e non dubidou en irse ao ataque en canto podía. As ocasións máis claras tivéronas Hugo Matos, que se retirou lesionado, Ocaña e Santi de Prado, pero non houbo fortuna para atopar a portería de Owono.
Con todo, os 7.400 espectadores que estiveron hoxe no Vero Boquete marcháronse a casa cunha sensación de orgullo, porque o equipo deuno todo nun partido que tivo todos os alicerces dun de Primeira División.
Agora, tralo gran rendemento na Copa, e continuando coas boas sensacións das últimas semanas, tocará unha nova cita na liga, tamén no Vero Boquete, contra o Coruxo. Será o domingo ás 17.00 horas.
FICHA TÉCNICA
0 – SD Compostela: Iago Domínguez; Roque (Santi de Prado, min.73), David Soto, Kike, Ocaña, Manu Rivas; Álvaro Casas (Selasi, min.57), Diego (Samu, min.73), Fer Cano (Carlos Cinta, min.73); Hugo Matos (Landeira, min.28) e Manu Barreiro.
1 – Deportivo Alavés: Owono; Egoitz, Mouriño, Pica, M. Diarra; Luka (Blanco, min.79), Guevara (Protesoni, min.46), Jordán, Conechy (Rebbach, min.67); Stoichkov (Carlos Martín, min.86) e Villalibre (Toni Martínez, min.67).
GOLES: 0-1: Kike (p.p.), min.12.
ÁRBITRO: Busquets Ferrer (Comité Balear). Amoestou a Landeira, polo Compos; e a Guevara, Mouriño e Luka, polo Alavés.
INCIDENCIAS: Estadio Vero Boquete de San Lázaro (Santiago de Compostela). Primeira eliminatoria da Copa do Rei disputada ante 7.400 espectadores. Antes do partido entregouse unha peza conmemorativa de acibeche ao Deportivo Alavés, entregada por Manuel Dávila, prateiro de Santiago de 90 anos.
