-
Un gol de Santi de Prado decidiu un derbi competido no que o Compos logrou tres puntos moi importantes
Santiago de Compostela, 3 de novembro de 2024
Vitoria moi importante para a SD Compostela, segunda seguida na casa, para seguir escalando na clasificación. O Compos superou por 1-0 ao Coruxo, cun gol de Santi de Prado, nun derbi moi igualado, conseguindo así tres puntos vitais.
A vitoria na casa, como fai quince días, conseguiuse a partir da portería a cero, a terceira seguida na liga. Moi sólidos atrás, sen recibir apenas perigo ata o último tramo do choque, os nosos aproveitaron a súa oportunidade no primeiro tempo e logo navegaron con vento a favor ata o asubío final.
O gol chegou á media hora, nunha acción a balón parado que acabou da mellor maneira. Saque en longo de Rabanillo, toque suave de Cinta para deixar o balón morto detrás dos defensas e entrada en velocidade dun Santi de Prado que encarou o porteiro e superouno cun disparo potente. Primeiro tanto para o carril na liga e segundo da tempada.
O tanto de Santi de Prado sentou ben a un Compos que soubo domar as acometidas do rival, aínda que sen percutir con demasiado perigo en área contraria ata o descanso. Esta circunstancia variou na segunda metade, chegando máis e mellor, aínda que sen acerto nos últimos metros. As máis claras tivéronas Fer Cano e Manu Barreiro, pero o primeiro atopou a Alberto e ao segundo escapóuselle unha cacholada por moi pouco.
Pola súa banda, o Coruxo apenas creou perigo. As súas opcións foron en dúas xogadas embarulladas. Un disparo de Añón, tapado por varios xogadores, que sacou Rabanillo cunha gran estirada e un golpeo de Borja, no rexeite dunha falta, que despexou ben o noso porteiro.
Por tanto, o 1-0 non se moveu e os tres puntos quedaron na casa. Triunfo moi importante para gañar confianza e manter as boas sensacións das últimas semanas. Unha vitoria crucial nunha tarde cun importante compoñente solidario, de axuda aos damnificados da DANA. Agora, tocará un novo derbi, o próximo sábado contra o Bergantiños nas Eiroas.
FICHA TÉCNICA
1 – SD Compostela: Rabanillo; Santi de Prado, Roque, Pablo Crespo, Ocaña, Manu Rivas; Álvaro Casas (Diego, min.46), Selasi (Samu, min.85), Fer Cano (Óscar Gil, min.90+3); Giuliano (Landeira, min.69) e Carlos Cinta (Manu Barreiro, min.69).
0 – Coruxo FC: Alberto; Terranova, Borja, Guido (Álex Rey, min.74), Álvaro F. (Pereiro, min.74), Naveira; Borja Domínguez, Willy Ibáñez; Hugo Rodríguez (El Ouatani, min.60); B. Diabaté (Insua, min.81) e Álex Pérez (Añón, min.60).
Goles: 1-0: Santi de Prado, min.31.
Árbitro: Lago Barreiro (Galicia). Amoestou a Manu Rivas, Álvaro Casas, Selasi, Ocaña, Giuliano e Roque, polo Compos; e a El Ouatani, Naveira, e Álex Rey, polo Coruxo.
Incidencias: Estadio Verónica Boquete de San Lázaro (Santiago de Compostela). Xornada 10 de Liga do Grupo 1 da Segunda RFEF disputado ante 1.483 espectadores. Antes do partido gardouse un minuto de silencio polos damnificados da DANA.
