-
O Compos caeu na final, 2-1, despois de que os locais remontasen o tanto inicial de Pablo Antas
Almendralejo, 13 de novembro de 2024
A SD Compostela quedou co mel nos beizos na Copa Federación. Os nosos rozaron o título, nunha final moi igualada, pero o triunfo levouno o Extremadura tras remontar o tanto inicial de Pablo Antas, 2-1.
O duelo decisivo no Francisco de la Hera foi unha contenda pechada, con poucas ocasións, que se acabou decidindo polo maior acerto local.
O Compos, que tivo a primeira oportunidade aos 4 minutos nas botas de Samu, adiantouse ao cuarto de hora cun gol en xogada de estratexia. Púxoa Fer Cano, cruzouna David Soto e remachouna á rede Pablo Antas, hoxe capitán, no seu regreso á titularidade.
Con todo, a vantaxe durou pouco, xa que Moussa aproveitou un rexeite na frontal para bater por baixo a Iago.
Non se veu abaixo o Compos que volveu gozar dunha inmellorable dobre ocasión, pero primeiro Samu e despois Santi de Prado non conseguiron a acertar coa rede.
E á volta dos vestiarios, chegou o segundo tanto local, obra de Rubén Cabeza.
De aí ao final foi un querer e non poder. Houbo moitos balóns colgados, varios remates con perigo, pero non se terminou de culminar ningunha acción. Por iso, o título quedou en Estremadura.
Agora, toca levantar cabeza deste golpe e centrarse na liga. Este domingo, ás 17.30 horas, chega ao Vero Boquete o Llanera.
FICHA TÉCNICA
2 – CD Extremadura: Robador; Samu Hurtado, Pardo, Tala (Dieguito, min.75), Alberto; Miguel Núñez; Marco (Leandro Izquierdo, min.90), Moussa, Platero (Fran Rosales, min.71; Rubén Cabeza (Cidoncha, min.75) e Callejón.
1 – SD Compostela: Iago Domínguez; Santi de Prado (Diego, min.75), Kike (Ocaña, min.44), David Soto, Roque, Manu Rivas; Selasi, Pablo Antas (Álvaro Casas, min.75); Fer Cano, Samu (Giuliano, min.58) e Carlos Cinta (Manu Barreiro, min.58).
Goles: 0-1: Pablo Antas, min.11; 1-1: Moussa, min.22; 2-1: Rubén Cabeza, min.49.
Árbitro: Aranda Delgado (Málaga). Amoestou a Pardo, Callejón, Miguel Núñez, Samu Hurtado e Moussa, polo Extremadura; e a Carlos Cinta e Manu Barreiro, polo Compos.
Incidencias: Estadio Francisco de la Hera (Almendralejo). Final da Copa Federación disputada ante uns 4.400 espectadores, aproximadamente. Antes do partido gardouse un minuto de silencio polos afectados da DANA.
