-
As defensas do Compos e do Ávila impuxéronse aos ataques nun duelo moi igualado que acabou 0-0
Santiago de Compostela, 15 de decembro de 2024
A SD Compostela volveu sumar un punto na Liga, deixando ademais a portería a cero. 0-0 contra o Real Ávila nun partido moi pechado, de alto nivel, no que as defensas se impuxeron aos ataques.
A ambos equipos custoulles xerar ocasións de perigo ante dúas defensas moi ben plantadas. O Ávila buscounos máis a balón parado e o Compos co balón xogado, pero ningún dos dous atopou premio aos seus ataques.
En clave compostelanista, pola banda dereita, coas subidas de Santi de Prado e David Soto, chegaron as ocasións máis perigosas dos nosos. Nunha delas, Hugo Matos mandouna arriba desde a frontal, e noutra, o pase de Santi non atopou rematador por milímetros. Ademais, Soto enviou arriba un testarazo e unha chegada ao segundo pau, aínda que o colexiado decretou fóra de xogo.
En defensa, nas poucas ocasións visitantes, Rabanillo liquidou todas elas sen problemas, especialmente unha boa parada no segundo tempo.
Con este punto, o Compos suma 22, en plena zona de ebulición da clasificación, con moitos equipos en escasos cinco puntos. Agora, tratará de facer bo o empate cunha vitoria para pechar o 2024. Será nos Anexos ao Estadio José Zorrila, o sábado ás 16.00 horas, contra o Real Valladolid Promesas.
FICHA TÉCNICA
0 – SD Compostela: J. Rabanillo; Santi de Prado, David Soto, Pablo Crespo, Ocaña, Roque; Selasi, Pablo Antas; Hugo Matos (Landeira, min.86), Fer Cano (Samu, min.68) e Carlos Cinta (Manu Barreiro, min.68).
0 – Real Ávila: Álvaro de Pablo; Deiby, Casio JR, Cesar Llopis, Fer Diaz, Toper (Caio, min.68); Adilson (Sisse, min.81), Vitolo; Adri Carrión (Pedro Luz, min.81), Alberto Martín (Campos, min.68) e Mario Rivas.
Goles: Sen goles.
Árbitro: Alonso Luiña (Asturias). Amoestou a Carlos Cinta, polo Compos; e a Casio JR e Fer Diaz, polo Ávila.
Incidencias: Estadio Verónica Boquete de San Lázaro (Santiago de Compostela). Xornada 16 do Grupo 1 da Segunda RFEF disputado ante 1.230 espectadores. Papá Noel fixo o saque de honra do partido.
