-
O evento, gratuíto e con entrada libre ata completar aforo, terá lugar no Auditorio do Museo das Peregrinacións, o 20 de marzo ás 18.30
-
Enlace para inscricións nas xornadas “Tecnoloxía e Deporte”: SD Compostela
Santiago de Compostela, 11 de marzo de 2025
A SD Compostela, en colaboración con Turismo de Galicia, organizan a segunda edición das xornadas “Tecnoloxía e Deporte”. O evento, de acceso gratuíto e previa inscrición, terá lugar o vindeiro xoves 20 de marzo, ás 18:30 horas, no Auditorio do Museo das Peregrinacións de Santiago de Compostela.
- Enlace de inscrición: SD Compostela.
Nesta segunda edición contaremos coa presenza de dous grandes expertos que falarán sobre como a tecnoloxía vai camiño de revolucionar o deporte:
- Miguel Ángel Leal, director xeral de La Liga Tech de 2021 a 2024.
- Lalo García Torres, CEO de HubIN, cofundador de Galicia Sportech Congress e de CeltaLab1923.
Con eles dous seguiremos abordando os novos camiños que abren as tecnoloxías máis avanzadas no mundo do deporte, abrindo paso a unha nova era, a cal permite ás entidades deportivas ser máis eficientes, con procesos preditivos que eran impensables ata fai moi pouco tempo.
Para iso, por unha banda, Miguel Ángel Leal impartirá o relatorio “Casos de uso da Intelixencia Artificial no mundo do fútbol”, mentres que, polo outro, Lalo García ilustraranos coa conferencia “Data Analytics no fútbol profesional”.
Ademais, neste evento aberto a todo o mundo, e do mesmo xeito que na primeira edición das xornadas “Tecnoloxía e Deporte”, pecharemos o acto cunha mesa redonda, na que o público asistente poderá dialogar e intercambiar opinións cos dous relatores.
Miguel Ángel Leal
Directivo con máis de 25 anos dedicado ao mundo da Tecnoloxía, como elemento de creación de valor nas organizacións. Desenvolveu funcións de liderado no sector do deporte, primeiro como CEO de LaLiga Tech e posteriormente como director de Tecnoloxía e Innovación de LALIGA. Investidor en startups multisectoriais, como Nexkin Medical Microviable Therapeutics ou Tadia.ai. Ademais, é membro do Consello Asesor de CIONET e ZeroNet IT.
Lalo García Torres
Profesional vinculado ao emprendemento desde 2005 como socio Fundador en Knowledge Investors (Aceleradores de Innovacion). A través da súa experiencia, xestiona programas de innovación aberta, como CeltaLab1923 ou Abanca Innova, así como un portfolio de máis de 90 startups, ademais de organizar os principais eventos de innovación desenvoltos en Galicia.
