-
Secho, técnico de Porto do Son, asina ata final de tempada co obxectivo de lograr a salvación
Santiago de Compostela, 25 de marzo de 2025
Jose Manuel Martínez Paz, máis coñecido como “Secho”, é novo adestrador da SD Compostela nesta tempada 24/25. O técnico de Porto do Son (1977), que se atopaba sen equipo, firma ata final de tempada. Chega co obxectivo de darlle volta á mala dinámica do equipo e loitar pola salvación do Compos na Segunda Federación.
Secho é un adestrador con experiencia no fútbol galego, tanto nas categorías de formación como no fútbol sénior. A súa última experiencia nos bancos foi en Carballo, a pasada campaña, logrando o ascenso co Bergantiños a Segunda RFEF, logo dunha fantástica tempada na que o equipo conseguiu o campionato de Liga.
Anteriormente, foi segundo adestrador do Real Club Deportivo da Coruña, acompañando a etapa de Rubén de la Barrera no cadro herculino; e técnico asistente do Club Deportivo Lugo na Segunda División.
Ademais, dentro do seu amplo currículo deportivo, foi tamén técnico do Noia, seleccionador galego sub-18 e adestrador da base do Deportivo durante moitas tempadas.
Con esta experiencia e a ilusión de poder salvar ao Compos, xa asinou o seu contrato e dirixirá mañá o seu primeiro adestramento co equipo para preparar a importantísima visita ao campo do Llanera deste sábado.
Benvido e moita sorte, Secho.
