-
Valín regresa a Galicia para buscar o ascenso co Compos
Santiago de Compostela, 10 de xullo de 2025
Un lateral con percorrido para a defensa compostelanista: Jorge Valín Sánchez (A Coruña, 07/01/2000) é novo xogador da SD Compostela. O futbolista coruñés, tras unha campaña en Andorra, regresa a Galicia para buscar o ascenso co Compos. Firma por unha tempada.
O Compos faise cos servizos dun lateral destro que destaca especialmente pola súa velocidade, a súa proxección ofensiva e a súa capacidade para xerar perigo desde a banda coas súas subidas ou os seus centros.
Desta forma, Valín regresa a Galicia, onde destacou nas filas do Deportivo. Canteirán do cadro herculino, chegou a debutar en Segunda División e formou parte do primeiro equipo durante unha tempada e media na Segunda B, para un total de 16 partidos disputados. Ademais, co Fabril, xogou tamén 42 encontros, repartidos en tres campañas, dúas elas aínda en idade xuvenil e na Segunda División B.
Chega ao Compos tras unha última tempada no UE Santa Coloma, da Primeira División de Andorra. Xogou 20 partidos, doce coma titular, marcando ademais un gol e repartindo unha asistencia.
Esta foi a súa última experiencia lonxe de Galicia, nunha etapa na que tamén vestiu as camisetas do Cornellà e Numancia, de Primeira Federación; e do A Nucía, de Segunda Federación.
Tras este periplo polo fútbol nacional e andorrano, ficha no Compos coa ilusión de conseguir o ascenso a Segunda RFEF.
Benvido, Valín!
