-
Aarón Martínez chega desde o Xuvenil de División de Honra do Celta
Santiago de Compostela, 11 de xullo de 2025
A SD Compostela incorpora talento e mocidade para a súa liña defensiva: Aarón Martínez Ribeiro (Redondela, 30/05/2006) é novo xogador do Compos. O mozo lateral esquerdo, con ficha sub23, chega do Xuvenil de División de Honra do RC Celta de Vigo e firma por unha tempada.
Aarón Martínez é un futbolista con proxección, que destaca polo seu bo golpeo de balón, a súa capacidade para asociarse, así como polas súas calidades defensivas, as cales demostrou á perfección esta pasada campaña no Xuvenil A do Celta.
Proba diso, esta pasada tempada, a nova fichaxe compostelanista foi o segundo xogador con máis minutos do seu equipo. En total, disputou 2.450 minutos repartidos en 29 partidos, 27 deles como titular, afianzándose como o dono e señor da banda esquerda celeste.
Tras esta brillante campaña, Aarón Martínez, formado nas categorías inferiores do CD Choco, club no que desenvolveu todo o seu periplo de base ata este último ano, vivirá a súa primeira experiencia como sénior en Compostela, onde agarda seguir demostrando o seu gran porvir.
Con moita ilusión e moitas gañas, buscará axudar ao Compos a lograr o obxectivo do ascenso.
Benvido, Aarón!
