-
O Compos ficha ao centrocampista guipuscoano Unai Peón, procedente do Atlético Coruña, que firma ata 2027
Santiago de Compostela, 29 de xaneiro de 2026
A SD Compostela segue reforzándose para a segunda volta: Unai Peón Cuesta (San Sebastián, 18/04/2004) é novo xogador compostelanista. O novo mediocentro, de 21 anos, chega procedente do Atlético Coruña Montañeiros e firma ata xuño de 2027.
Unai Peón é un mediocentro polivalente, que pode actuar tanto en calquera posición do centro do campo como de central, cunha gran proxección e que destaca pola súa capacidade de liderado, o seu percorrido e o seu manexo do balón. Con ficha sub23, vén demostrando o seu gran rendemento nas filas do equipo coruñés, onde foi peza fundamental durante as tres tempadas.
Así, a nova fichaxe branquiazul ponse ás ordes de Secho tras unha gran primeira volta na que disputou 17 dos 18 partidos de liga, 16 deles como titular, para superar xa os 1.300 minutos de xogo, no que está a ser o seu debut na Terceira RFEF.
Deste xeito, consolidou o nivel que xa viña demostrando en Preferente, con dúas tempadas e media (a primeira media campaña sendo xuvenil) nas que xogou 86 partidos, sendo un dos líderes dun equipo que logrou o ascenso a Terceira, así como unha Copa Coruña.
Anteriormente, a nova fichaxe branquiazul destacou nas categorías inferiores do Club Deportivo Lugo, onde estivo ata División de Honra.
Agora, Unai Peón chega ao Compos para dar un paso máis na súa carreira deportiva e axudar ao equipo a acadar o ascenso. Con ese obxectivo, e tras firmar o seu novo contrato, mañá súmase aos adestramentos do primeiro equipo.
Benvido, Unai.
