-
O sábado 6 de xuño, o Campo das Cancelas acollerá o torneo patrocinado polo Centro Comercial para categorías benxamín e prebenxamín
Santiago de Compostela, 21 de maio de 2026
A Canteira Picheleira presentou esta mañá a segunda edición do Torneo F8 As Cancelas, que organizará o próximo sábado 6 de xuño no Campo Municipal das Cancelas. Unha xornada lúdica e deportiva, patrocinada polo Centro Comercial, para categorías Benxamín e Prebenxamín.
Un total de 24 equipos formarán parte desta xornada de convivencia na que non só se disputarán partidos durante todo o día, senón que, grazas ao patrocinio de As Cancelas, tamén haberá actividades lúdicas para o desfrute dos cativos, sorteos de premios e moitas sorpresas máis.
Dende o club agradecemos ao Centro Comercial a aposta, unha vez máis, por este torneo, para nenos e nenas de 6 a 10 anos, no que se fomentarán os valores positivos do deporte. Ademais, grazas ao seu apoio, a inscrición é totalmente gratuíta para todos os equipos participantes.
Formato do Torneo de Fútbol 8.
No Torneo As Cancelas participarán un total de 24 equipos, doce por categoría, dividindo a xornada en dúas fases. Pola mañá, disputaranse os partidos da Fase de Grupos, divididos os clubs en catro liguiñas de tres conxuntos cada unha. Pola súa banda, pola tarde, manterase a disposición da primeira edición, para que todos os equipos disputen un número similar de partidos.
En función da clasificación da mañá, cada equipo entrará na Fase Ouro, Prata ou Bronce, na que se medirá a equipos que quedaran no seu mesmo posto pola mañá. Deste modo, haberá tres equipos gañadores en cada categoría, fomentando a participación por igual.
Por último, destacar que a entrega de Trofeos, como curiosidade, se fará na planta superior do Centro Comercial As Cancelas, unha vez finalice o Torneo.
Presentación no Centro Comercial.
A segunda edición do Torneo As Cancelas foi presentada esta mañá na planta superior do Centro Comercial, coa presenza de Miguel Fernández, xerente da SD Compostela, e Javier Nicolás, xerente do CC As Cancelas e Pilar Lueiro, concelleira de Deportes.
