-
Cunha recta final de liga decisiva, os nosos aseguraron a súa presenza na División de Honra, máxima categoría xuvenil, por sexta tempada consecutiva
Santiago de Compostela, 20 de maio de 2026
O Xuvenil A da SD Compostela certifica unha nova permanencia na División de Honra. Os nosos acadan así a súa sexta tempada consecutiva na máxima categoría do fútbol xuvenil nacional e consolídanse entre os mellores do panorama estatal.
O conxunto capitaneado por Suso Álvarez protagonizou un inicio de curso prometedor, sumando tres vitorias nos seis primeiros encontros e logrando, ademais, un meritorio empate ante o RC Celta, que acabaría proclamándose campión da categoría.
Tras un momento complicado no ecuador da primeira volta, o equipo soubo recompoñerse e pechou o ano natural cunha dinámica positiva, competindo de ti a ti cos conxuntos máis potentes. Nese tramo, destacou o empate fronte ao Sporting de Gijón e a importante vitoria por 1-3 en Santander ante o Racing.
Xa na recta final, os nosos deron un paso adiante cun sprint decisivo, no que sumaron cinco triunfos nos últimos nove partidos, resultados que permitiron asegurar o obxectivo da permanencia.
Deste xeito, o Xuvenil A reafirma o seu crecemento e continuidade nunha das competicións máis esixentes do fútbol base nacional. Un logro que volve situar a Santiago de Compostela entre as cidades con presenza na elite do fútbol xuvenil estatal e que permitirá que o orgullo picheleiro continúe representado, por sexto ano consecutivo, na máxima categoría.
