-
O mediocentro, elixido pola afección cos seus votos na rede social ‘X’, recibiu esta mañá o premio de mans de Mahou
Santiago de Compostela, 27 de maio de 2026
Diego Uzal é o Jugador Cinco Estrellas da SD Compostela na Tempada 2025/26. O mediocentro coruñés foi elixido pola afección como o mellor xogador da campaña cos seus votos na rede social ‘X’. Esta mañá, no palco do Estadio Vero Boquete de San Lázaro, recibiu o seu galardón de mans de Mahou, o noso patrocinador e impulsor desta iniciativa.
Na súa primeira campaña en Compostela, Diego Uzal foi un xogador fundamental nos esquemas do Compos ao longo de toda a campaña. Neste sentido, pechou a tempada regular como o xogador de campo con máis minutos disputados, rozando os 3.000. En total, xogou 33 partidos, todos eles como titular, perdéndose tan só un por sanción, e marcou un gol.
Xa fose no centro do campo ou na zaga, foi un pulmón para o equipo, e ségueo sendo no play off. Unha capacidade de esforzo, compromiso e liderado que levaron á afección a elixilo como o mellor xogador da tempada en clave compostelanista.
Por todo iso, esta mañá recibiu o galardón Jugador Cinco Estrellas de mans de Hugo Pérez, Responsable de Marketing Local e de Clientes de Mahou Galicia, nun acto no que tamén estiveron os outros catro candidatos finalistas ao premio: Antón Guisande, Maceira, Álex Cobo e Adrián Armental.
Mahou, patrocinador do premio ao Jugador Cinco Estrellas.
O Jugador Cinco Estrellas de Mahou é unha iniciativa moi especial impulsada polo noso patrocinador, que recoñece, por unha banda, aos xogadores máis destacados, e polo outro, aos seus afeccionados, que son os encargados da elección.
Ademais, coa entrega deste premio, Mahou segue demostrando o seu apoio á SD Compostela, un vínculo que se mantén forte desde hai anos.
