-
O Compos caeu na ida 2-1 na súa visita ao Arteixo e terá que remontar na volta no Vero Boquete
Arteixo, 31 de maio de 2026
A SD Compostela caeu derrotada no partido de ida da final autonómica do play off, 2-1, e terá que remontar na volta, en casa, para superar a eliminatoria. Todo se decidiu nunha segunda parte vertixinosa, na que marcaron primeiro os nosos, pero que acabou coa vantaxe do Arteixo.
O partido en Ponte dos Brozos foi un duelo típico de play off, moi igualado e cun ambientazo nas bancadas, con medio milleiro de afeccionados desprazados desde Compostela.
Na primeira metade, as defensas impuxéronse aos ataques. As presións altas facían dano a ambos conxuntos, provocando imprecisións que, con todo, non acabaron en gol.
Tras senllas perdas do Compos, Álex Cobo apareceu imperial para despexar, primeiro, un disparo axustado desde a frontal; e despois, para tapar todos os ocos nun man a man con Martínez.
Pola súa banda, en ataque, tras varios disparos desde a frontal que se escaparon por pouco, a máis clara para os compostelanistas chegou nos instantes finais, nun centro raso de Parapar que se paseou pola área pequena e que Cañi non foi quen de remachar a gol no segundo pau. Un defensa apareceu no último instante para quitarlle o balón cando xa se relambía para empuxala.
Tralo paso polos vestiarios, ambos conxuntos seguiron co seu plan, aínda que agora si, chegarían os goles, e o primeiro, obra do Compos. No enésimo roubo, os nosos montaron a contra, liderada por Samu e o capitán inventouse un pase maxistral para pór a Parapar no man a man, quen a mandou a gardar, 0-1.
Corría o minuto 55 e o Compos conseguira o máis complicado, con todo, todo cambiou trece máis tarde, xa que os locais conseguiron empatar, por obra de Jota, tras recibir unha defectuosa cesión atrás e bater a Cobo no un contra un.
Os locais viñéronse arriba co gol, que fixo dano ao Compos, e acabaron atopando o segundo, a cinco para o final, cun potente disparo de Otero que se coou pola escuadra, 2-1.
Os nosos tentárono cun último tirón, no que tiveron un bo tiro de Goris na área, pero este foi tapado por un defensa. Por iso, a contenda culminouse coa mínima vantaxe local.
Agora, o vindeiro domingo, ás 18:30 horas no Vero Boquete, aos nosos tocaralle reporse para poder gañar o partido e remontar a eliminatoria. Co apoio da bancada, como fai sete días, o Compos buscará o pase de rolda, que está a un gol.
FICHA TÉCNICA
2 – Atlético Arteixo: Carlos; Iván, Agulló, Tomé, Manu Berrocal; Pablo Naya, Queijeiro; Rubo (Moreta, min.83), Martínez (Melo, min.66), Jota (Lamas, min.88); e Otero (Rojo, min.88).
1 – SD Compostela: Álex Cobo; Valín, Quico, Pablo Crespo, Damián Noya; Diego Uzal, Samu (Unai, min.85); Parapar (Goris, min.80), Antón Guisande, Cañi (Riki Mangana, min.80); e Maceira (Charly, min.80).
Goles: 0-1: Parapar, min.55; 1-1: Jota, min.68; 2-1: Otero, min.85.
Árbitro: Juan Carlos Valero (Madrid). Amoestou a Queijeiro, polo Arteixo.
Incidencias: Campo Municipal Ponte dos Brozos (Arteixo). Partido de ida da final autonómica do play off de ascenso a Segunda RFEF con máis de 1.000 espectadores na bancada, medio milleiro afeccionados da SD Compostela.
