-
O atacante valenciano Álex Gil, con pasado recente no Ourense CF, chega procedente do Numancia
Santiago de Compostela, 11 de xullo de 2026
Álex Gil Rochina (Valencia, 22/10/1997) achegará maxia ao ataque da SD Compostela en Segunda Federación. O futbolista valenciano chega tras unha última campaña no Numancia, onde disputou o play off de ascenso, e firma ata xuño de 2027.
Aos seus 28 anos, Álex Gil é un futbolista contrastado na categoría, que destaca pola súa velocidade e desequilibrio no un contra un. Un xogador versátil, que pode actuar en ambas bandas ou mesmo de mediapunta, e que posúe unha gran capacidade para achegar desborde, verticalidade e traballo constante para o equipo. Todas estas calidades foron valoradas pola dirección deportiva para acometer a súa fichaxe.
Neste senso, o polivalente atacante é un exemplo de responsabilidade, traballo e compromiso, uns valores que demostrou na súa única etapa en Galicia, nas filas do Ourense CF. No cadro ourensanista foi fundamental para conseguir o título de liga e ascenso a Primeira Federación, no seu primeiro ano, e tamén tivo un bo papel na meritoria salvación do curso seguinte. En total, na cidade das Burgas disputou 75 partidos, marcando 6 goles e achegando 14 asistencias.
Ademais, tamén conta con experiencia no Grupo 1 da categoría. Á citada tempada no Ourense, hai que sumarlle este último ano no Numancia, onde disputou 33 partidos, marcando un gol; así como a campaña 21/22 co Navalcarnero. No cadro madrileño estivo dous cursos (o outro enrolados no Grupo 5), nos que disputou dúas promocións de ascenso a Primeira, participando en 64 partidos e anotando 9 goles.
Formado na canteira do Levante, equipo co que debutou na Segunda División B, tamén pasou polo filial do Alcorcón.
Agora, regresa a Galicia con gañas de afrontar un novo desafío na súa carreira deportiva e axudar ao Compos, co seu traballo, calidade e bo xogo, a lograr grandes obxectivos.
Benvido, Álex Gil.
