-
Edu Sousa achegará reflexos, seguridade e experiencia á portería compostelanista
Santiago de Compostela, 10 de xullo de 2026
Eduardo Daniel Sousa Iglesias (Tui, 15/07/1991), máis coñecido como Edu Sousa, é novo porteiro da SD Compostela para a Tempada 26/27. O experimentado arqueiro tudense chega ao Compos cunha sólida traxectoria ás súas costas, con máis de 300 partidos entre Segunda División B, Primeira e Segunda Federación. Firma por unha campaña.
Coa súa incorporación, o Compos reforza o seu plantel cun porteiro recoñecido pola súa seguridade baixo paus, os seus reflexos felinos e a súa personalidade. Ademais, trátase dun perfil de xogador que achegará experiencia e liderado ao grupo, tanto dentro como fóra dos terreos de xogo.
Estas calidades, unidas ao seu rendemento deportivo nas últimas campañas, levaron á dirección deportiva encabezada por Borja Yebra a acometer a súa fichaxe.
Edu Sousa chega a Compostela trala súa segunda etapa no Pontevedra, conxunto no que desenvolveu boa parte da súa carreira, con 10 tempadas e 326 partidos oficiais disputados. Neste último periplo disputou tres campañas nas que acadou un ascenso á Primeira Federación.
Ademais, o gardameta, formado en canteiras como a do Atlético de Madrid e Deportivo, tamén xogou dúas tempadas no Talavera, na Segunda División B e Primeira RFEF, así como unha no Deportivo da Coruña, tamén en Primeira Federación.
Agora, emprende unha nova aventura na súa carreira deportiva, fichando na SD Compostela. Un novo reto que afronta con ilusión, ambición e moitas gañas.
“Poder chegar ao Compos é unha ilusión moi grande, á vez que unha responsabilidade tamén moi grande, porque sei que chego a un club histórico, a un club que estivo no máis alto do fútbol español, e iso fala por si só. Afronto esta etapa con moita ilusión, con moita ambición, e intentaremos desde o principio achegar o noso gran de area para que o Compos sexa un equipo gañador, un equipo que teña as cousas claras e optar ao máis alto”, destaca a nova fichaxe do Compos.
Benvido, Edu Sousa.
