-
O central sub23 Vilela chega ao Compos tras acadar o ascenso á Primeira Federación co Deportivo Fabril
Santiago de Compostela, 28 de xullo de 2026
Xuventude, carácter e futuro para o plantel da SD Compostela: Rubén Vilela Montes (Ribadeo, 29/04/2005) é novo xogador compostelanista. O central, con ficha sub23, aportará á defensa branquiazul talento, solidez e unha gran proxección. Chega ao Compos tras acadar o ascenso á Primeira Federación co Deportivo Fabril.
Vilela é un central contundente, de gran envergadura, seguro no xogo aéreo e con boa saída de balón. Un defensor que destaca tamén pola súa intelixencia táctica, o seu compromiso defensivo e a súa marxe de crecemento. Aos seus 21 anos, dá un paso máis na súa cuarta carreira, co obxectivo de seguir evolucionando e achegar consistencia á liña defensiva.
Formado na canteira do RC Deportivo da Coruña, a nova fichaxe compostelanista medrou futbolísticamente en Abegondo desde categoría infantil, completando unha salientable traxectoria ata consolidarse no Fabril. Co segundo equipo coruñés, co que debutou sendo xuvenil, disputou esta pasada campaña once encontros, oito deles coma titular, axudando a conseguir o ascenso.
Ademais desta experiencia na Segunda Federación, Vilela conta tamén con pasado na Terceira, xa que estivo cedido un curso na Sarriana, conxunto co que tamén acadou o ascenso de categoría. Co equipo lucense disputou 28 encontros, a metade deles coma titular, superando os mil minutos de xogo.
Nesas dúas tempadas como sénior, ademais de ensinar un importante crecemento futbolístico, mostrou a súa personalidade, fiabilidade defensiva e capacidade para competir ao máximo nivel. Por iso, coa súa incorporación, o Compos suma un futbolista mozo, ambicioso e cun valioso ADN competitivo, o cal encaixa á perfección no proxecto deportivo do club.
Con esa ambición e esas gañas de competir, e con dous ascensos consecutivos ás súas costas, Vilela sumouse esta mañá aos adestramentos do equipo, ás ordes de Carlos de Lerma.
Benvido ao Compos, Rubén!
