-
A nova camiseta visitante do Compos, de Adidas, loce tons verdes, característicos da paisaxe compostelá e da estampa da Praza
Santiago de Compostela, 31 de xullo de 2026
Compostela e o seu Mercado de Abastos protagonizan o segundo equipamento da SD Compostela para a Tempada 2026/27. A nova camiseta visitante, de Adidas, evoca os tons característicos da capital galega e da súa Praza, marca que, como novidade, estará presente na indumentaria.
Deste xeito, o club volve xerar ese vínculo entre cidade e equipo coas súas camisetas. E é que o Mercado de Abastos é un elemento identitario de Compostela, o mesmo que o é o Compos.
A combinación de verdes co azul celeste entronca así os tons típicos da zona vella de Santiago e do Mercado, así como dos produtos da terra que se venden nel, coa cor do equipo, un azul que tamén está moi presente nas peixarías. Ademais, a trama poligonal do frontal da camiseta fai referencia aos edificios da Praza.
Así mesmo, como a primeira camiseta, a indumentaria Adidas leva a marca Xacobeo 2027 no peito, con motivo do próximo Ano Santo, emblema tamén da capital galega.
Por iso, con esta peza, o Compos levará a esencia de Compostela polos campos de Galicia, Asturias, Cantabria e o País Vasco.
As primeiras unidades da camiseta estarán xa dispoñibles á venda a partir de mañá, 1 de agosto, cun prezo de 62,95€ (os abonados teñen un 10% de desconto), nos lugares habituais: a Tenda Oficial da Rúa dá Raíña e na páxina web de Fútbol Emotion (https://www.futbolemotion.com/es/categoria/colectivos/equipaciones-s.d.-compostela).
Posta de longo no Mercado de Abastos.
Con tres das novas caras desta tempada -Álex Gil, Jordan e Miguel Prado- como modelos, a nova camiseta da SD Compostela foi presentada esta mañá no Mercado de Abastos, froito da colaboración entre a Praza e o club para o lanzamento desta indumentaria.
No acto, alén dos xogadores, tamén estiveron presentes a concelleira de Deportes de Santiago, Pilar Lueiro; o concelleiro de Mobilidade, Convivencia e Centros Socioculturais, Xan Duro; a xerente do Mercado de Abastos, Marta Rey; e o xerente da SD Compostela, Miguel Fernández.
“Queremos agradecer á Praza de Abastos e ao Concello a súa predisposición para facer esta colaboración, na que buscamos vincular o Compos cun dos puntos máis significativos da cidade. Escollemos o verde, mesturado co celeste, porque é esa cor tan típica dos toldos e das ventás de Santiago, así como da Praza, unha cor que tamén está vencellada aos produtos de tempada. Seguimos sendo así embaixadores da nosa cidade”, sinalou o xerente Miguel Fernández.
“Se hai dúas cousas que son tradición en Compostela son o Mercado de Abastos e a SD. Combinar ambas entidades nunha camiseta é unha das mellores ideas que teño visto nas equipacións do Compos. Como concelleiro responsable da Praza, é un orgullo presentar esta camiseta e faime moitísima ilusión que os xogadores corran a banda lucindo o Mercado de Abastos”, destacou o concelleiro Xan Duro.
