Os nosos estrearán os derbis galegos visitando este domingo ás 17 horas ao Coruxo en O Vao
Santiago de Compostela, 9 de outubro de 2026
A SD Compostela afrontará este domingo un dos compromisos máis esixentes no calendario do Grupo 1 da Segunda Federación. O equipo de Carlos de Lerma desprazarase ata Vigo para medirse ao Coruxo FC no Campo do Vao (17 horas), no que será o primeiro derbi galego da tempada para o cadro picheleiro.
Os nosos chegan á cita tras colleitar catro puntos nas primeiras cinco xornadas de Liga, pero afrontan este partido como unha nova oportunidade para sumar de tres e acadar a primeira vitoria neste curso lonxe do Vero Boquete. Pola súa parte, o Coruxo vén de caer derrotado por 3-1 fronte ao Bergantiños, o que deixou ao cadro vigués con cinco puntos na táboa clasificatoria, unha unidade por riba dos nosos.
O escenario non será doado, pois O Vao é un estadio que historicamente lle custa á Esedé na última década. Ademais, o Coruxo é un club asentado na Segunda Federación, onde disputou as súas seis tempadas, cun histórico playoff no pasado curso. A pesar destes precedentes, o noso técnico Carlos de Lerma afirmou que o encontro debe servir para “ser nós mesmos” e “ir en busca dos tres puntos“.
Na súa intervención ante os medios de comunicación, o técnico extremeño destacou que este derbi debe servir como “un punto de inflexión para revertir a situación actual do equipo”. Á hora de analizar ao rival, o adestrador branquiazul puxo en valor a a faceta ofensiva dos vigueses, “especialmente co seu xogo vertical“, o que o converte nun contricante moi diferente aos demais e que será moi perigoso no seu feudo. O noso preparador tamén falou da capacidade do Coruxo para manexar dúas estruturas de presión diferentes (tanto en bloque alto como en bloque medio-baixo), o que esixirá unha adaptación constante por parte do equipo.
En canto ao estado da plantilla, a enfermería condicionará novamente a convocatoria do Puma para este primeiro derbi da tempada. Rubén Vilela e Edu González seguirán a ser baixa ao non recibir aínda a alta médica. O mesmo ocorre con Damián Noya, quen traballa á marxe do grupo á espera de coñecer o resultado das súas probas médicas. A única dúbida na expedición será a de Álex Gil, con quen se tomará unha decisión “de última hora” en función do seu estado físico.
Máis alá dos precedentes e das dinámicas, o Compostela afronta este partido coa máxima ambición e ilusión por conseguir os tres puntos. Nese sentido, o noso técnico sinalou que “queremos conseguir esa vitoria para logo darlle continuidade ante a nosa afección“.
