-
O xogador formado nas categorías inferiores do Deportivo firma por un ano.
Santiago de Compostela, a 12 de Xuño de 2017.
A SD Compostela 2017/18 xa conta cun lateral esquerdo. O coruñés Álvaro Naveira López (08/05/97) ficha polo Compos tras crecer como futbolista nas categorías inferiores do RC Deportivo da Coruña. O xogador ven a ocupar unha posición que quedou deserta este verán tras a retirada de Cabrejo, e firma ata xuño de 2018.
Álvaro é un lateral esquerdo de 20 anos, que deu o salto ao equipo filial deportivista o curso pasado, e que xa debutou co primeiro equipo nalgún partido amigable, a pretemporada pasada. No seu primeiro ano de sénior, o lateral disputou cinco encontros coa elástica branquiazul en Liga, tres deles coma titular, e dous en Copa Deputación, cunha titularidade. Nos sete partidos xogados, o filial deportivista só encaixou tres goles e levou o triunfo en todos eles, agás as semifinais da Copa, nas que perdeu contra o Rácing de Ferrol.
Antes de dar o salto, Álvaro foi un xogador moi importante nas diferentes categorías da base coruñesa, chegando desde abaixo ata o xuvenil de División de Honra, co que apunto estivo de lograr o título de liga na tempada 2014/15. Ademais, na 15/16, chegou a xogar un partido co filial, contra o Cerceda na xornada 26.
Coa firma polo Compos, o futbolista dará o salto a un equipo e cidade diferente. Terá a importante papeleta de suplir a un enorme veterano como Juan Cabrejo, o cal lle dobra en idade, pero desde a directiva esperan que dea o máximo de si e que cumpra á perfección a tarefa de ocupar o carril esquerdo.
Doutra banda, trátase da segunda fichaxe do Compos para a tempada 2017/18, tras a contratación de Álvaro Casas, e o décimo cuarto xogador asinado para o novo curso, na que obxectivo está posto nos catro primeiros lugares da clasificación.
