-
O Torneo F8 CC As Cancelas será para categoría Prebenxamín e Benxamín, nunha gran xornada lúdica e festiva
Santiago de Compostela, 5 de xuño de 2023
A Canteira Picheleira presentou esta mañá a primeira edición do Torneo F8 CC As Cancelas, que organizará o próximo sábado 17 de xuño no campo municipal compostelán. Será unha gran xornada lúdica e deportiva, na que os cativos participantes o pasarán en grande. A competición será para as categorías Prebenxamín (nados en 2015 e 2016) e Benxamín (2013 e 2014).
A xornada no Campo das Cancelas comezará ben cedo e rematará pola noite (de 9.00 a 21.00 horas), nun día no que haberá partidos e emoción, pero tamén actividades lúdicas para o desfrute dos pequenos e pequenas. Será un sábado de convivencia para nenos e nenas, de 6 a 10 anos, no que se fomentarán os valores positivos do deporte.
Patrocinado polo Centro Comercial As Cancelas
No Torneo F8 CC As Cancelas participarán un total de 24 equipos, doce por categoría, dividindo a xornada en dúas fases. Pola mañá, disputaranse os partidos da Fase de Grupos, divididos os clubs en catro liguiñas de tres conxuntos cada unha. Pola súa banda, pola tarde, chegará a principal novidade.
En función da clasificación da mañá, cada equipo entrará nunha Fase Ouro, Prata ou Bronce, na que se medirá a equipos que quedaran no seu mesmo posto pola mañá. Deste modo, haberá tres equipos gañadores en cada categoría, potenciando a participación de tod@s por igual, xa que disputarán un número similar de encontros.
A inscrición é totalmente gratuíta grazas ao patrocinador do torneo, o Centro Comercial As Cancelas, entidade que volve a colaborar cunha das nosas iniciativas. O establecemento sufragará os gastos de inscrición para premiar aos cativos que participarán nesta gran xornada.
Dentro das novidades, a maiores, os nenos e nenas participantes, pola mañá, poderán desfrutar dun xogo paralelo 2×2. Haberá agasallos asegurados, cun pack de benvida, e faranse competicións reducidas para gañar entradas para CINESA.
Por último, destacar tamén que a entrega de Trofeos, como curiosidade, se fará na planta superior do Centro Comercial As Cancelas, unha vez finalice o Torneo.
Presentación do Torneo nas Cancelas.
A primeira edición do Torneo F8 CC As Cancelas foi presentada esta mañá na planta superior do centro comercial, coa presenza de Juan Carlos Gesto, presidente da SD Compostela, e Miguel Calviño, presidente do CD Conxo, en representación da Canteira Picheleira; e de Javier Nicolás, xerente do CC As Cancelas.
Sorte a tod@s e que desfrutedes dun gran día este próximo sábado 17 de maio.
