-
A SD Compostela impúxose por 0-1 ao Atlético Arteixo con gol de Hugo Matos
Santiago de Compostela, 26 de xullo de 2023
O Compos debutou na pretempada cunha vitoria no Memorial Lisardo Campos. Os nosos superaron por 0-1 ao Atlético Arteixo, de Terceira RFEF, no primeiro duelo desta etapa estival. Un gol de Hugo Matos, no primeiro tempo, decidiu a contenda na Ponte dos Brozos.
Con Manel Menéndez debutando como adestrador da SD Compostela, o equipo estreouse nesta pretempada tras unha semana e media de adestramentos. Foi nun partido con moita presenza de canteiráns, con dous onces diferenciados en cada parte e cun ritmo de xogo propio destas alturas do ano.
Os nosos arrincaron o duelo cunha aliñación formada por: Borja Rey; Rubén Casas, Kike, David Soto, Dani Varela; Pablo Antas, Gonzalo Landeira, Fer Beltrán; Parapar, Hugo Matos e Manu Barreiro.
Nese primeiro acto chegaría o único tanto do encontro, aos 25 minutos, nunha acción por banda. Hugo Matos recibiu pegado á liña, deixouna ao espazo para a carreira de Fer Beltrán, este devolveulla atrás e o extremo entrou só polo carril central para marcar a pracer ante o porteiro.
Pola súa banda, no segundo acto, o once do Compos estivo composto por: Pato Guillén; Riki Mangana, Álvaro Casas, Jorge Sálamo, Martín; Xoel, Antón de Vicente, Jordan; Pep Caballé, Juampa e Jaime Santos.
A pesar das ocasións, o marcador xa non se moveu e a contenda terminou co citado 0-1 para a SD Compostela.
Do partido cabe destacar o debut das novas fichaxes, así como de varios canteiráns. Entre eles, Jorge Sálamo, quen con 15 anos se estreou co primeiro equipo. Xunto a el, Dani Varela, que, tras realizar a pretempada pasada, volve estar presente nos encontros estivais, agora con 17 anos.
O próximo amigable será este mesmo sábado, 29 de xullo, contra o Racing Vilalbés, do Grupo 1 da Segunda RFEF. O I Memorial José Antonio Río disputarase ás 18.00 horas en Alfoz (Lugo).
