Santiago de Compostela, a 28 de Novembro de 2016
No marco da súa viaxe por Europa, o presidente de Uruguai, Tabaré Vázquez, non se quixo marchar sen antes visitar as instalacións da Sociedade Deportiva Compostela en San Lázaro.
Da man do presidente do club, Antonio Quinteiro, e do presidente da Xunta de Galicia, Alberto Núñez Feijóo, o mandatario uruguaio cumpriu o soño do seu fillo maior, Álvaro, ao que se lle quedou a espiña cravada de non entrar nas instalacións da entidade santiaguesa cando realizou o Camiño de Santiago.
Por iso, o club sentiuse encantado de convidalos e recibilos en San Lázaro. Como agradecemento, Tabaré Vázquez foi nomeado socio de honra e recibiu unha camiseta co seu nome, asinada por todo o plantel.
Tabaré Vázquez presidira o Club Atlético Progreso de Montevideo e lembraba á SD Compostela polas súas tempadas en Primeira División, por recibir un dos goles máis míticos de Ronaldo na tempada 1996/97 e polo seu partido contra o Nacional de Montevideo, no centenario da entidade da capital uruguaia.
Antes disto, Vázquez atopouse cos xogadores no campo, ocasión que aproveitou para dirixirse á nova fichaxe do cadro santiagués, o uruguaio aficando en Santiago de Compostela, Gonzalo García “Recoba”. Ademais, tamén se atreveu a probar a Lucas, lanzándolle dous penaltis.
O mandatario uruguaio tamén se interesou por cuestións relativas á seguridade no estadio e ás esixencias sanitarias que este tiña que cumprir. Durante o traxecto ás oficinas do club, Vázquez tamén tivo a oportunidade de observar o campo de adestramento da SD Compostela.
Unha vez no salón de trofeos e tras un breve percorrido pola historia do club, o presidente, a súa esposa e o seu fillo maior recibiron os dous equipamentos que a SD Compostela viste esta tempada.
O encontro concluíu coa firma de Tabaré Vázquez no libro de visitas do equipo.
