Santiago de Compostela, ao 3 de xaneiro de 2016.
O mediocentro da Sociedade Deportiva Compostela Alberto Freire xogará cedido ata final de tempada no Bertamiráns, equipo da Preferente Norte Galicia, á vez que renovou o seu contrato co club por tres tempadas.
O mozo nicrariense, que subiu este ano ao primeiro equipo desde o xuvenil de Liga Nacional, sae do equipo branquiazul en busca duns minutos que non tivo no Compos. En total, Alberto xogou 135 minutos nesta primeira volta da competición, repartidos en dous partidos, precisamente nos que saíu de titular. Estes encontros foron a derrota da primeira xornada contra o Deportivo B, no que disputou os 90 minutos, e na trece no empate a cero contra o Ordes en casa, no que xogou a primeira metade.
A pesar da cesión, o novo futbolista ten contrato co Compos por tres anos, o que demostra que é unha das novas promesas coas que o club quere contar para o futuro.
Así, ambas as partes acordaron que o mellor para esta segunda volta era unha cesión na que puidese disputar o maior número de partidos posibles, unha cesión que se pechou co Bertamiráns, conxunto que marcha décimo cuarto no Preferente Norte con 21 puntos.
