-
José Sobrido estará cedido polo Celta durante esta tempada, despois de acabar a súa etapa xuvenil.
Santiago de Compostela, a 2 de Agosto de 2017.
A sétima incorporación da tempada. O dianteiro ribeirense José Sobrido González (07/04/1998) chega cedido polo Celta de Vigo por unha tempada, despois de asinar dezasete goles no seu último ano como xuvenil de División de Honra.
O novo ariete chegou ao cadro celeste no primeiro ano de cadetes prodecente do Xuventude Aguiño, cos que anotou a frioleira de 77 goles en Liga Galega. Durante os seus dous anos en Cadetes, o punta destacou pola súa facilidade para ver porta, o que lle valeu a súa renovación para a etapa xuvenil. No seu primeiro ano, o curso 14/15, xogou no Celta de Liga Nacional un total de 33 partidos, 22 deles de titular, nos que anotou 25 goles, cos que fraguou o segundo posto na táboa do conxunto vigués.
Ese verán, grazas ao seu gran rendemento, José Sobrido realizou a pretempada co Celta B, xogando mesmo algún amigable, pero coa mala fortuna de sufrir unha rotura de fibras no cuádriceps. Con todo, comezou a liga co xuvenil, pero volveu recaer e decidiron que parase para cicatrizar a lesión. Na súa volta na recta final do campionato conseguiu anotar varios tantos que axudaron ao equipo a lograr o título ligueiro. Ao final marcou 9 dianas a pesar das lesións.
E esta tempada foi a da súa consagración no Xuvenil A. Desde comezo de ano asentouse como a dianteiro referencia do equipo da base do Celta, pechando o curso con 17 goles. Entre eles, destaca o tanto na ida dos cuartos de final da Copa do Rey ante o Atlético de Madrid ou o tanto acadado nos cuartos de final da Copa de Campións contra o Osasuna.
Rápido, intelixente e con bo trato de balón, estas son as características que o definen como dianteiro, calidades coas que buscará facerse un oco no once inicial de Yago Iglesias, na que será a súa primeira tempada de sénior.
Con esta incorporación, o plantel queda conformado con vinte futbolistas, máis os catro xuvenís que seguen realizando a pretempada.
