-
Canteira Picheleira: tres ascensos, unha Copa do Sar e presenza en todas as principais ligas
Santiago de Compostela, 30 de xuño de 2023
Pechouse a primeira tempada da Canteira Picheleira, un ano de grandes éxitos para os nosos que se pechou da mellor maneira, co ascenso do Xuvenil B da SD Compostela á Liga Galega. Foron tres ascensos, unha Copa do Sar e, o máis importante, lograr ter aos equipos en todas as principais ligas de categorías inferiores de Fútbol-11.
Precisamente, o último logro da Canteira Picheleira era un dos máis buscados polos nosos. O ascenso a Liga Galega do Xuvenil B era un obxectivo dende hai anos e por fin se logrou. Tras acabar segundos, o Compos foi quen de superar dúas eliminatorias e dar o salto de categoría, clave para que o chanzo a División de Honra sexa menor.
Mención destacada tamén merece o Infantil A da SD Compostela, capaz de ascender á liga Galega despois de gañar a competición ligueira e superar con claridade ambas eliminatorias do playoff. Precisamente, na gran final mediuse a outro dos nosos, o Infantil B do Conxo, quen tamén realizou unha magnífica tempada.
Un éxito para ambos da Canteira Picheleira que chegaron ata a última rolda e, aínda que se merecían o salto de categoría, só podía ascender un.
En todo caso, non foi o único logro do Infantil B do Conxo, que acadou a Copa do Sar, despois de superar na final ao Sar Extramundi. Un torneo histórico no que foron avanzando roldas, a pesar de estar inmersos en plena fase de ascenso e na que levaron o premio final.
Pola súa banda, favorecidos polo ascenso do Infantil A, tamén conseguiu o ascenso o Infantil B da SD Compostela, no seu caso, á Primeira Galicia. Os nosos, tras quedar segundos en Liga, disputaron o playoff no que se impuxeron ao Sar Extramundi e ao Rois, pechando unha gran fase que acabou da mellor maneira.
Foi un ascenso en diferido, xa que tras completar o seu traballo tiveron que agardar unha semana máis para poder celebrar o seu éxito, dada a necesidade de que subise o equipo A.
Representación nas principais ligas de base.
Ademais dos citados, os principais equipos da base conseguiron manter as súas categorías, polo que a Canteira Picheleira estará representada nas categorías máis altas de Fútbol-11 durante a próxima tempada.
A base da SD Compostela e do Conxo Santiago mantén un equipo en Preferente; en xuvenís, un en División de Honra, outro en Liga Nacional e agora dous en Liga Galega; en cadetes, un en División de Honra e dous en Liga Galega; e en infantís, un en División de Honra e outro en Liga Galega. A eles súmanse os equipos en ligas locais.
