-
O club celebrou hoxe a súa Asemblea Xeral na que se decidiu abrir o proceso electoral para o nomeamento dunha nova Xunta
Santiago de Compostela, 3 de xullo de 2023
A Sociedade Deportiva Compostela celebrou hoxe a súa Asemblea Xeral no Estadio Verónica Boquete de San Lázaro. A Asemblea celebrouse en sesión ordinaria e extraordinaria, establecendo, por amplo acordo maioritario, a folla de ruta a seguir para a transformación da entidade en Sociedade Anónima Deportiva (SAD).
Ademais de estipular o camiño que levará ao Compos á súa conversión en SAD, na Asemblea decidiuse abrir o prazo para a celebración de eleccións á presidencia da SD Compostela. Do mesmo xeito, nomeouse unha comisión xestora, que dirixirá o club ata o día das eleccións.
Todos os puntos da Asemblea foron aprobados por unha ampla maioría.
Aprobación das contas na sesión ordinaria.
A Asemblea Xeral iniciouse coa celebración da sesión ordinaria, na que se ratificou a entrada e nomeamento dos novos socios do club. Nela, ademais, foron aprobadas as contas anuais propostas, correspondentes aos anos 2019, 2020, 2021 e 2022, así como as memorias descritivas de actividades das tempadas correspondentes.
Como último punto da sesión, foi aprobado tamén o orzamento da tempada 23.24 para a súa posterior presentación nos rexistros pertinentes.
Os socios acordan a modificación dos estatutos e convocan as eleccións.
Unha vez celebrada a sesión ordinaria da Asemblea Xeral, celebrouse outra extraordinaria, na que se examinaron e aprobaron modificacións nos estatutos da entidade.
Entre os acordos adoptados nesta sesión extraordinaria da Asemblea Xeral, pola ampla maioría dos socios, destacou a aprobación da transformación do club en Sociedade Anónima Deportiva.
Así mesmo, tamén se acordou o establecemento dun novo sistema para o nomeamento da Xunta Directiva da SD Compostela. Deste xeito, aprobouse que o modelo para seguir sexa mediante un procedemento de candidaturas completas e pechadas, xurdidas do propio proceso electoral.
Unha vez acordado este punto, produciuse o cesamento de toda a Xunta Directiva actual, así como o nomeamento dunha Xunta Xestora, a cal estará á fronte da entidade ata a toma de posesión da nova directiva. Para iso, aprobouse a apertura do procedemento electoral para o nomeamento do novo órgano reitor do club. As eleccións celebraranse o luns 25 de setembro.
A futura Xunta Directiva, xunto cos novos órganos de xestión do club que desde esta xunta se establezan, liderarán a transformación do Compos en SAD.
Nesta liña, mantense a folla de ruta anunciado polos novos socios nas anteriores reunións cos abonados. Trala súa entrada no club, o Compos segue avanzando cara á súa conversión en SAD, un proceso fundamental para garantir o crecemento da entidade.
