Fran López, xuventude e polivalencia para o ataque da SD Compostela

• Fran López chega cedido polo Celta para a Tempada 23.24

Santiago de Compostela, 18 de xullo de 2023

Fran López Fernández (Ferrol, 24.01.2002) é novo xogador da SD Compostela para a Tempada 23.24. O dianteiro chega cedido desde o RC Celta de Vigo, reforzando o ataque compostelanista para esta campaña.

Fran López destaca por ser un ariete veloz, con capacidade para ser invisible para os defensas e cunha gran definición. Ademais, polas súas características, adáptase tanto á posición de ‘9’ como a calquera das bandas ou mesmo de segundo dianteiro. Estas condicións levaron á dirección deportiva a apostar pola súa incorporación para esta tempada.

Formado na canteira viguesa, Fran López foi crecendo nos diferentes equipos da Madroa ata dar o salto a seniors, onde seguiu demostrando as grandes calidades que atesoura. Ese gran rendemento mesmo lle levou a adestrar con asiduidade co primeiro equipo, a ir convocado en varios encontros de Primeira División e a debutar, na pretempada, no Memorial Quinocho, unha estrea que chamou a atención de todos por dar dúas asistencias de gol.

En clave do filial, estreouse no Celta B na Segunda B sendo aínda xuvenil. Pechada a súa etapa na base pasaría a enrolarse no Celta C, de Preferente, onde se sairía compartindo dianteira con Darío Germil. En total, 27 partidos disputados e 19 goles, logrando o ascenso a Terceira RFEF. Ademais, tamén participaría en 4 duelos, todos saíndo desde o banco, co B, de Primeira RFEF.

E o curso pasado, en Terceira RFEF, foi de novo unha das pezas destacadas do Celta C, loitando polo playoff de ascenso co novo equipo céltico. Pechou o ano con 22 encontros xogados, 18 saíndo de inicio, e 8 tantos anotados. Así mesmo, volveu repetir presenza no Celta B, de Primeira RFEF, nesta ocasión, participando en cinco partidos.

Seguindo a súa progresión, aos seus 21 anos, Fran López chega agora á SD Compostela co obxectivo de seguir demostrando o seu gran nivel. Despuntou en Preferente, fíxoo en Terceira e agora buscará facelo na Segunda RFEF.

O mozo dianteiro, asinado o acordo entre clubs, súmase á pretempada do Compos esta mesma mañá, participando xa no primeiro adestramento ás ordes de Manel Menéndez.

Coa súa incorporación, a SD Compostela 23.24 conta con 19 xogadores con contrato para a Tempada 23.24: Pato, Borja Rey, Riki Mangana, David Soto, Álvaro Casas, Kike, Pablo Crespo, Damián, Martín, Antón de Vicente, Pablo Antas, Fer Beltrán, Jordan Domínguez, Jaime Santos, Pep Caballé, Parapar, Juampa, Fran López e Manu Barreiro.