O Compos empatou 0-0 en Miramar contra o Marino na primeira xornada
Luanco, 3 de setembro de 2023
A SD Compostela sumou o seu primeiro punto da Tempada 23.24 en Miramar. Os nosos empataron 0-0 contra o Marino de Luanco nun encontro moi serio e igualado, pero no que faltou acerto na zona de ataque.
Para a partida en Miramar, Manel Menéndez partiu cun once formado por Pato, Riki, Soto, Casas, Samu, Antas, Antón, Jordan, Parapar, Juampa e Jaime Santos. Coa súa primeira aliñación, o novo técnico compostelanista, no seu debut oficial no banco, buscaba dar continuidade ao traballo de pretempada e sumar os primeiros puntos do curso.
Desde o inicio viuse a un Compos dominador coa pelota. Sólido atrás, sen conceder e buscando o ataque con pausa, aínda que sen atopar a fortuna nos últimos metros. Tívoa Pablo Antas, nunha acción a balón parado, pero rematou fóra cando estaba só.
Sen claridade para acertar no arco rival, quedou todo por decidir para a segunda metade.
Cun cambio nos locais, a contenda seguiu polo mesmo camiño. Dous equipos ben atrincheirados atrás, pero falta de claridade en campo rival. Puido chegar o gol nunha ocasión de Parapar, tras unha deixada de costas de Juampa, pero Denis, moi atento, saíu a tapar o intento de golpeo do extremo coruñés.
Fóronse consumindo os minutos e foron chegando os cambios. Manel deu entrada, primeiro, a Manu Barreiro e Euse; e despois, a Hugo Matos. Precisamente, a entrada do canteirán deu electricidade ao ataque, atopando máis espazos.
Respondendo ao alto ritmo dos nosos, os locais terían a súa nas botas de Abraham José, nun tiro virándose que detivo Pato á perfección. E a seguir, chegou unha das máis claras para os nosos. Un centro de Hugo a área pequena ao que non chegou Manu Barreiro por milímetros.
Houbo máis cambios, entraron Pep Caballé e Fer Beltrán, e de novo tería outra ocasión clara o Compos. Jaime Santos, na frontal e en perfecta posición, tras un centro raso de Pep, mandou arriba a pelota. Sen acerto, o marcador xa non se moveu, 0-0 final.
Primeiro punto para os branquiazuis na súa estrea ligueira. Dentro de sete días tentarán facelo bo na casa, contra a Arandina. O encontro disputarase o domingo ás 19.00 horas no Vero Boquete.
FICHA TÉCNICA
0 – MARINO DE LUANCO: Denis; Borja, Traoré, Aspra, Guaya; Nacho Matador; David Iglesias (César, m.46), Lora, Iván Elena (Abraham José, m.73), Miguel Cuesta (Jandro, m.92); e David Grande.
0 – SD COMPOSTELA: Pato Guillén; Riki Mangana, David Soto, Álvaro Casas, Samu Araújo (Euse, m.69); Pablo Antas, Antón de Vicente (Fer Beltrán, m.89); Parapar (Hugo Matos, m.79), Jordan (Manu Barreiro, m.69), Juampa (Pep Caballé, m.89); e Jaime Santos.
GOLES: Sen goles.
ÁRBITRO: Barrio Salas (País Vasco). Amoestou a Jandro, polo Marino; e a Samu Araújo e Hugo Matos, polo Compos.
INCIDENCIAS: Estadio Municipal de Miramar (Luanco). Xornada 1 do Grupo 1 da Segunda RFEF.
