-
O Compos superou por 3-1 ao Real Avilés nun gran partido e xogará polo playoff na última xornada
Santiago de Compostela, 28 de abril de 2024
A SD Compostela chegará á última xornada sen depender de si mesmo, pero si con plenas opcións de loitar polo playoff de ascenso. Era necesaria a vitoria para seguir con opcións e, unha vez máis, os nosos conseguírono. Gran duelo, gran imaxe e un triunfo máis que merecido, diante da afección, por 3-1 contra o Real Avilés Industrial.
Un gran inicio de partido e un bo arranque da segunda parte foron claves para que o Compos conseguise o triunfo.
Nuns primeiros minutos fulgurantes, os nosos adiantáronse cun gran pase de Jaime Santos para o corte de Manu Ramírez e a asistencia deste para Pep Caballé, que empurrou o balón á rede no segundo pau. E sen tempo para saborealo, un omnipresente Parapar gañoulle a batalla ao porteiro, púxoa para Pablo Antas, sacouna un defensor na liña, pero o rexeite caeu nas botas de David Grande, que marcou por segunda xornada consecutiva.
Co 2-0 puido caer algún tanto máis, pero o que chegou foi a reacción visitante, co gol de Davo Fernández, remachando en área pequena unha acción pola dereita.
Coa vantaxe mínima chegouse ao intermedio, pero os nosos arrincaron a segunda metade igual que a primeira. Mesma intensidade e mesma puntería. Aos seis minutos, Samu, tras combinar con Manu Ramírez, soltaba un petardazo desde a frontal imposible para o porteiro. 3-1 e vantaxe definitiva, que os nosos souberon administrar sen apenas pasar apuros.
Cos tres puntos, o Compos chega vivo á última xornada na que se medirá, de novo o domingo ás 12.00, contra o Rayo Cantabria, outro dos contendentes á quinta praza, que da acceso ao playoff. Será nas Instalacións Nando Yosu.
FICHA TÉCNICA
3 – SD COMPOSTELA: Pato Guillén; Pep Caballé, Roque, David Soto, Kike (Álvaro Casas, m.89), Jaime Santos; Samu (Antón de Vicente, m.81), Pablo Antas; Parapar (Hugo Matos, m.81), Manu Ramírez (Jordan, m.71) e David Grande (Manu Barreiro, m.71).
1 – REAL AVILÉS INDUSTRIAL CF: Davo; Trabanco, Julio Rodríguez, J. del Amo, Iván Serrano; Sierra (Joel del Pino, m.67), Edu Cortina (Alberto Martín, m.76), Mecerreyes, Davo Fernández (Isma Cerro, m.67); Jorge e Natalio.
GOLES: 1-0: Pep Caballé, min.14; 2-0: David Grande, min.17; 2-1: Davo Fernández, min.28; 3-1: Samu, min.52.
ÁRBITRO: Bordons Romero (Madrid). Amoestou a Kike e Samu, polo Compos; e a Julio Rodríguez, polo Real Avilés Industrial.
INCIDENCIAS: Estadio Verónica Boquete de San Lázaro (Santiago de Compostela). Xornada 33 do Grupo 1 da Segunda RFEF disputado ante 1.823 espectadores.
