-
Diego González, primeira fichaxe da SD Compostela, chega tras destacar no Guijuelo e firma por 1 ano
Santiago de Compostela, 14 de xuño de 2024
Diego González Díaz (Santibáñez de Béjar, 19/05/1999) é a primeira fichaxe da SD Compostela para a Tempada 24.25. O centrocampista salmantino, con ampla experiencia na Segunda RFEF, chega tras destacar no Guijuelo e firma por unha campaña.
Diego González é un claro perfil de todocampista. Un mediocentro incasable, que destaca tanto pola súa capacidade como recuperador de balóns como pola súa habilidade para asociarse e chegar a área rival. Un futbolista moi enérxico, que abarca moito campo e cunha gran capacidade de sacrificio sobre o verde.
Estas características, que tan ben demostrou esta pasada campaña en Guijuelo, levaron á dirección deportiva do Compos a afrontar a súa fichaxe. Nesta liña, Diego González chega de ser unha peza fundamental no conxunto charro, titular indiscutible e eixo central dun conxunto que disputou o playoff de ascenso a Primeira RFEF. En total, xogou 36 partidos no curso, con máis de 2.600 minutos de xogo, nos que tamén anotou tres goles.
Con anterioridade, o canteirán do Guijuelo tamén destacara no Palencia Cristo Atlético, onde estivo dúas tempadas e media. En terras palentinas logrou un ascenso a Segunda RFEF e foi un dos xogadores destacados do equipo nos seus dous anos na categoría, disputando 63 partidos, anotando 4 goles e disputando mesmo un playoff de ascenso a Primeira RFEF.
O futbolista de 25 anos tamén conta con experiencia no Santa Marta de Tormes, de Terceira RFEF, no que xogou tras saír de xuvenís; así como no Unionistas de Salamanca, no que disputou unha campaña e media na Segunda División B.
Con esa ampla experiencia e cargado de ilusión, Diego González chega ao Compos co obxectivo de darlle moitas alegrías á parroquia branquiazul.
Bienvenido e moita sorte, Diego!
