-
Turbi, tras rematar a etapa xuvenil co División de Honra, será parte do primeiro equipo
Santiago de Compostela, 29 de xullo de 2026
Adrián de la Fuente López “Turbi” (Santiago de Compostela, 18/01/2007) dá o salto á SD Compostela. O canteirán, que leva desde o comezo da pretempada ás ordes de Carlos de Lerma, ascende así ao primeiro equipo tras rematar con éxito a súa etapa xuvenil co División de Honra.
Coa súa incorporación, o adestrador compostelanista contará cun futbolista polivalente, xa que pode actuar por ambos carrís, así como en calquera das posicións de tres cuartos de campo. Así mesmo, Turbi destaca pola súa velocidade e desborde e unha gran capacidade para desequilibrar desde o un para un, así como para atacar espazos e xerar ocasións de perigo.
Con 19 anos, o canteirán conta tamén cunha gran marxe de crecemento, tanto a nivel táctico como físico, un potencial moi valorado polo club.
O novo xogador do primeiro equipo chegou á Canteira Picheleira en idade xuvenil, formando parte primeiro do Conxo Santiago e promocionando ao División de Honra do Compos no seu segundo ano, equipo no que tamén estivo a tempada pasada. Na máxima categoría do fútbol formativo foi un fixo no once compostelanista, sendo peza fundamental para acadar a salvación en ambas ocasións.
Ademais, cabe destacar que nestas pasadas tempadas era un habitual dos adestramentos do primeiro equipo, participando tamén na pasada pretempada, na que marcou un gol.
Desta forma, Turbi seguirá coa súa progresión na SD Compostela.
Moitos parabéns, Adrián!
